भारतमा कोरोना भाइरस संक्रमितको संख्या मंगबारसम्म एक करोड चार लाख ७९ हजारभन्दा बढी पुगेको छ।
विगत २४ घण्टाको अवधिमा भारतमा १२ हजार ५ सय ८४ नयाँ संक्रमित फेला परेपछि कोरोना संक्रमितको संख्या एक करोड चार लाख ७९ हजार १ सय ७९ पुगेको केन्द्रीय स्वास्थ्य तथा परिवार कल्याण मन्त्रालयले जनाएको छ। गत २४ मा भारतमा कोरोना संक्रमणको कारण १ सय ६७ जनाको मृत्यु भएपछि कोरोना भाइरसबाट मृत्यु हुनेको संख्या एक लाख ५१ हजार ३ सय २७ जना पुगेको छ।
भारतमा कोरोना भाइरस संक्रमणको कारण २ सय भन्दा कम व्यक्तिको मृत्यु आज दोस्रो दिन भएको सो मन्त्रालयले जानकारी दिएको छ। मन्त्रालयको पछिल्लो विवरणमा भारतमा एक करोड एक लाख भन्दा बढी व्यक्ति संक्रमणमुक्त भएको देखिएको छ। हाल भारतमा दुई लाख १६ हजार ५ सय ५८ सक्रिय संक्रमित रहेका छन्।
भारतको राष्ट्रिय राजधानी दिल्लीमा आइतबार ३ सय ६ जना थप व्यक्तिमा कोरोना भाइरसका संक्रमण देखिएको र १३ जनाको मृत्यु भएको छ। भारतमा कोभिड–१९ शुरु भएयता भाइरस संक्रमणको कारण दिल्लीमा १० हजार ६ सय ९१ भन्दा बढीको मृत्यु भइसकेको छ।यसैबीच, सरकारले देशका विभिन्न भागमा कोभिड–१९ परीक्षणलाई तीव्रता दिने बताएको छ।
भारतीय स्वास्थ्य अनुसन्धान परिषद्ले आइतबारसम्म देशभर १८ करोड २६ लाख ५२ को हाराहारीमा नमूना परीक्षण गरेको छ। हिजो सोमबार एक दिनमा ८ लाख ९७ हजार ५६ जनाको कोभिड–१९ परीक्षण गरेको छ।
