लगातार नयाँनयाँ रेकर्ड बनाउँदै अगाडि बढेको धितोपत्र बजारमा शेयर कारोबार मापक नेप्से परिसूचक आज पनि दोहोरो अङ्कले बढेको छ। आजको वृद्धिपछि नेप्से नयाँ विन्दुमा पुगेको छ। नेपाल स्टक एक्सचेन्जका अनुसार २८.४६ विन्दुले वृद्धि भई नेप्से दुई हजार ३ सय १५ मा पुगेको छ।
यस्तै ठूला कम्पनीको शेयर कारोबार मापन गर्ने सेन्सेटिभ परिसूचक ८.१७ विन्दुले वृद्धि भई ४४३.४२ मा पुगेको छ। नेप्सेको वृद्धिसँगै कारोबार रकममा समेत वृद्धि देखिएको छ। कूल २ सय ८ कम्पनीको एक करोड ५० लाख ३५ हजार २ सय २१ कित्ता शेयर छ अर्ब ३७ करोड ४२ लाख ६७ हजार ७ सय ८२ रुपैयाँ मूल्यमा खरीदबिक्री भए। आजको वृद्धिसँगै बजार पूँजीकरण ३१ खर्ब १८ अर्ब २९ करोड ५४ रुपैयाँ लाख बराबर पुगेको ।
कारोबार भएका कूल १२ उपसमूहमध्ये आज जलविद्युत् उपसमूहको शेयर ओरालो लागेको छ। कूल ११ उपसमूहको शेयर उकालो लाग्दा व्यापार, जीवन बीमा र लघुवित्त उपसमूहमा भने उल्लेख्य वृद्धि देखिएको छ। जलविद्युत् ७.२ ले ओरालो लाग्दा बैंकिङ १.०१, व्यापार २३२.९७, होटेल १६.८७, विकास बैंक ११०.०१, वित्त २५.०१, निर्जीवन बीमा ७८.०५, उत्पादन ४९.८२, अन्य ६०.७६, लघुवित्त ११५.५५, जीवन बीमा २२१.०१ र सामूहिक लगानी कोष ०.०८ ले उकालो लागेको छ।
कारोबारका आधारमा नेपाल दूरसञ्चार कम्पनी शीर्षस्थानमा रहेको छ। सो कम्पनीको ५८ करोड १० लाख १२ हजार ६६ रुपैयाँ बराबरको कारोबार भयो। यस्तै एनआइसी एसिया बैंक २२ करोड ९० लाख २४ हजार ८ सय ७९ रुपैयाँ, सिभिल बैंक २० करोड ९९ लाख सात हजार ६ सय ९६ रुपैयाँ, नेपाल पुनर्बीमा कम्पनी १८ करोड ६९ लाख ९७ हजार ८ सय ६८ रुपैयाँ, नेको इन्सुरेन्स कम्पनी १७ करोड १० लाख पाँच हजार ३ सय ७३ रुपैयाँ, नेपाल बंगलादेश बैंक १५ करोड ८४ लाख ९३ हजार ६ सय १४ रुपैयाँ, प्रभु बैंक १५ करोड ६५ लाख ६१ हजार ७ सय ५८ रुपैयाँ, नेपाल लाइफ इन्सुरेन्स १४ करोड ९० लाख ९३ हजार ८ सय ५१ रुपैयाँ र एभरेष्ट बैंक १२ करोड ४२ लाख सात हजार ७ सय ८१ रुपैयाँ बराबरको कारोबार भई शीर्ष स्थानमा रहेको छ।
कारोबार भएकामध्ये कूल १ सय १८ कम्पनीको शेयरमा वृद्धि भएको छ भने ५२ कम्पनीको शेयर ओरालो लागेको छ। यस्तै पाँच कम्पनीको शेयर मूल्यमा भने कुनै परिवर्तन देखिएन। कारोबारका आधारमा साल्ट टेडिङ कर्पोरेशन १०, गुराँस लघुवित्त ९.९८, नारायणी डेभलपमेन्ट बैंक ९.९८, कर्पोरेट डेभलपमेन्ट बैंक ९.९७, सामुदायिक लघुवित्त ९.९७, प्रभु लाइफ इन्सुरेन्स ९.९६, किसान लघुवित्त ९.९५, महिला सहयात्रा माइक्रोफाइनान्स ९.९३, आरम्भ चौतारी लघुवित्त ९.९२ र मञ्जुश्री फाइनान्सका लगानीकर्ताले ९.९२ प्रतिशतले कमाए।
यसैगरी युनाइटेड फाइनान्स ५.७१, मिर्मिरे लघुवित्त ३.११, नेपाल एसबिआई बैंक २.७९, रसुवागढी हाइड्रोपावर २.५८, साञ्जेन जलविद्युत् कम्पनी २.०६, शिवश्री हाइड्रोपावर २, एनआइसी एसिया ऋणपत्र १.९६, सनराइज बैंकको ऋणपत्रका लगानीकर्ताले १.८६ प्रतिशतले गुमाए।
