इटालियन लिग सिरी ए फुटबलमा शीर्षस्थानको एसी मिलानले सिजनको दोस्रो हार बेहोरेको छ। गय राति भएको खेलमा एसी मिलान एटलान्टासँग ३–० गोलले पराजित भएको हो।
एसी मिलानको घरलु मैदान सान सिरोमा भएको खेलको २६ औं मिनेटमा पाहुना टोली एटलान्टाले शुरुवाती अग्रता बनाएको थियो। उसका लागि क्रिस्टियन रोमेरोले गोल गरेका थिए।
पहिलो हाफमा एक गोलले पछि परेको मिलानले दोस्रो हाफमा थप २ गोल खान पुग्यो। खेलको ५३ औं मिनेटमा एटलान्टाले पेनाल्टी पायो। पेनाल्टीमा गोल गर्दै जोसिप इलिसिसले एटलान्टाको अग्रता दोब्बर बनाए। त्यस्तै, खेलेको ७७ औं मिनेटमा डुभान जापाटाले गोल गर्दै एटलान्टाले जित पक्का पर्याे।
हारका बाबजुद एसी मिलान १९ खेलबाट ४३ अंकका साथ सिरी एको शीर्षस्थानमा छ। दोस्रो स्थानमा रहेको इन्टर मिलानको समान खेलबाट ४१ अंक रहेको छ। एटलान्टा १७ खेलमा ३४ अंक बटुल्दै पाँचौं स्थानमा छ।
