पहिलो चरणमा काभ्रेपलाञ्चोकमा तीन हजार ५ सय ८१ कोरोना भ्याक्सिन (कोभिसिल्ड) आवश्यक पर्ने भएको छ। सरकारी रणनीतिअनुसार पहिलो चरणमा कोरोना संक्रमणविरुद्ध अग्रभागमा रहेर कामगर्ने विभिन्न क्षेत्रका व्यक्तिलाई उक्त खोप दिन आवश्यक रहेको जिल्लास्थित कोभिड–१९ रोकथाम तथा नियन्त्रण, कमाण्ड पोष्टले जनाएको हो।
पोष्टले अग्रभागमा काम गर्ने ७ सय ४९ सरकारी स्वास्थ्यकर्मी, एक हजार ३सय ६८ निजी स्वास्थ्य संस्थाका स्वास्थ्यकर्मी, ९ सय ५५ महिला स्वास्थ्य स्वयंसेविका, स्थानीय तहको सरसफाइ क्षेत्रमा कार्यरत १ सय ११, निजी क्षेत्रका स्वास्थ्य संस्थाका सरसफाइमा कार्यरत २ सय २८ लाई पहिलो चरणको कोरोना सुई लगाइने जनाएको हो।
यसैगरी कोरोना संक्रमणबाट मृत्यु भएकाको शव व्यवस्थापनमा खटेका १ सय २६ सुरक्षाकर्मी तथा अस्पतालका सुरक्षा गार्ड र ४४ एम्बुलेन्स चालकलाई खोप लगाउने तयारी भइरहेको पोष्टका सदस्यसचिव एवं जिल्ला स्वास्थ्य कार्यालय प्रमुख डा नरेन्द्र झाले जानकारी दिए। यही माघ १४ गतेदेखि नमोबुद्ध नगरपालिकास्थित प्रादेशिक मेथिनकोट अस्पताल र धुलिखेल अस्पतालबाट उक्त सेवा उपलब्ध हुने तयारी भइरहेको छ।
कोरोनाविरुद्ध अग्रभागमा काम गर्ने पहिचान गरिएका व्यक्तिलाई पहिलो चरणअन्तर्गत उक्त खोप दिइन लागेको हो। ‘भ्याक्सिन अघिल्लो दिन सम्बधित अस्पताल आइपुग्ने तयारी भइरहेको छ, दुई अस्पतालबाट स्थानीत तह÷भेग र सेवाक्षेत्र अनुसार भ्याक्सिन सेवा उपलब्ध गराउने तयारी गरेका छौँ’, डा झाले भने।
उनका अनुसार भ्याक्सिनपछि केहीको स्वास्थ्यमा नकारात्मक देखिनसक्ने भएकाले दुई अस्पतालमा नै ‘आकस्मिक बेड’ तयारी अवस्थामा राखिनेछ। पहिलो चरणमा पनि एक व्यक्तिलाई दुई पटकअर्थात् दुई हप्ताको फरकमा अर्को खोप लगाइनेछ। भारत सरकारले गत हप्ता नेपाल सरकारलाई ‘कोभिसिल्ड’ नामक कोरोनाविरुद्धको भ्याक्सिन उपलब्ध गराएको थियो।
यसैबीच काभे्रपलाञ्चोकमा कोरोना भाइरस संक्रमितको संख्या शून्यतातर्फ लागेको छ। आइतबार कोही पनि संक्रमित देखिएनन् तर पनौती नगरका एक ७४ वर्षका कोरोना संक्रमित वृद्धको मृत्यु भयो। गत पुस २९ गते संक्रमण पुष्टि भएका ती वृद्धको मृत्यु भएपछि आइतबारसम्ममा काभ्रेपलाञ्चोकका ४५ कोरोना संक्रमितको मृत्यु भएको छ।
मृत्यु हुनेमा ३१ पुरुष र १४ महिला रहेको पोष्टले जनाएको छ। साथै अन्य जिल्लाका काभ्रेपलाञ्चोकस्थित अस्पतालमा कोरोना भाइरस् संक्रमण उपचारका क्रममा १२ पुरुष र चार महिलाको मृत्यु भएको छ।
शनिबार पनौतीकै एक पुरुष तथा शुक्रबार पनि धुलिखेलका एक पुरुषमा कोरोना संक्रमण देखिएको हो। त्यअघिका दिनमा पनि केहीमा मात्रै कोरोना संक्रमण देखिएको डा झाले बताए। उनले भने, ‘आवश्यकतामा मात्रै परीक्षण हुने गरेको छ, जोखिम घट्दै गएकाले कन्ट्याक्ट टेसिङ पनि गर्न आवश्यक देखिएको छैन।’ उनका अनुसार पछिल्लो हप्तादेखि कोरोना संक्रमणको लक्षण देखिएकाको मात्रै परीक्षण हुने गरेको हो।
पोष्टका अनुसार हालसम्म जिल्लामा तीन हजार ३२४ मा कोरोना संक्रमण देखिएको थियो। संक्रमित एक हजार ९ सय ७० पुरुष र एक हजार ३ सय ५४ महिलामध्ये तीन हजार २ सय ४९ अर्थात् ९७ दशमलव ७४ प्रतिशत संक्रमणमुक्त भइसकेका छन्। संक्रमणमुक्त हुनेमा एक हजार ९ सय ३९ पुरुष र एक हजार ३ सय १० महिला हुन्। हाल जिल्लाका १६ महिला र १४ पुरुष सक्रिय संक्रमित छन्।
उनीहरुमध्ये एक महिला अस्पताल र बाँकी सबै होम आइसोलेशनमा उपचाररत रहेको पोष्टले जनायो। हाल काभ्रेपलाञ्चोकका १३ स्थानीय तहमध्ये छ तह पाँचखाल र नमोबुद्ध नगरपालिका तथा रोशी, महाभारत, खानीखोला र चौँरीदेउराली गाउँपालिका संक्रमणमुक्त भएका छन्। हाल बनेपा नगरमा १४, धुलिखेलमा चार, पनौतीमा आठ, मण्डनदेउपुरमा एक तथा भुम्लु गाउँपालिकामा एक, बेथानचोकमा एक र तेमाल गाउँपालिकामा एक संक्रमित रहेका छन्।
