वैज्ञानिक अनुसन्धान र खोजमा संलग्न अभियन्ता महावीर पुनले नेतृत्व गरेको राष्ट्रिय आविष्कार केन्द्रलाई युरोपबाट सघाउन ‘फ्रेन्ड्स अफ एनआइसी नेपाल’ नामक संस्था गठन गरिएको छ।
पुनको उपस्थिति सम्पन्न भर्चुअल बैठकमा राष्ट्रिय आविष्कार केन्द्र (एनआइसी) युरोप समन्वय समितिका संयोजक इञ्जिनियर हरिकृष्ण न्यौपानेले ‘फ्रेन्ड्स अफ एनआइसी नेपाल’ नामक मुनाफा नकमाउने संस्था युकेमा दर्ता गरिसकिएको र उक्त संस्थालाई युकेकै च्यारिटी कमिशनमा दर्ता गर्ने प्रक्रिया शुरु गरिएको जानकारी दिएका हुन्।
न्यौपानेले कम्पनीको बैंक खाता खोल्ने प्रक्रिया शुरु गरिएको र खाता खोल्न साथै त्यसको विवरण सार्वजनिक गरिने बताए। उनले छिट्टै काठमाडौंस्थित राष्ट्रिय आविष्कार केन्द्रलाई सघाउन चाहने जो कोहीले युकेमा डाइरेक्ट डेविट र विश्वभरिबाट बैंक ट्रान्सफर गर्न सकिने बताए।
समन्वय समितिको दोश्रो बैठकमा सबै उपसमितिले आफ्नो प्रगति विवरण र आगामी कार्य योजनाबारे जानकारी गराएका थिए। यही जनवरी महिनाको शुरुमा विभिन्न नेपाली समुदाय तथा युरोपस्थित पेशागत समूहहरूको प्रतिनिधित्व हुने गरी एनआइसी युरोप समन्वय समितिको गठन गरिएको थियो।
समितिको मुख्य उद्देश्य विदेशस्थित नेपालीहरूसँग रहेको शीप र विज्ञता नेपाल स्थानान्तरण गर्ने तथा नेपालमा एनआइसीले कार्यन्वयन गरिरहेका परियोजनाहरूका लागि आर्थिक सहयोग जुटाउने रहेको न्यौपानेले बताएका छन्।
समितिले चार्टर्ड एकाउन्टेन्ट युवराज न्यौपानेको संयोजनमा च्यारिटी तथा आर्थिक समिति, इञ्जिनियर घनश्याम पौडेलको संयोजनमा इञ्जिनियरिङ तथा प्रविधि समिति, वेद भट्टराईको संयोजनमा फन्ड रेजिङ तथा इभेन्ट कमिटी, नेप्लिज डक्टर्स एशोसिएशन युकेका अध्यक्ष डा. रमेश खोजुको अध्यक्षतामा स्वास्थ्य समिति, भगीरथ योगीको संयोजनमा मिडिया समिति गठन गरिएको छ।
प्राध्यापक पदम सिम्खडा तथा प्राध्यापक केशव दाहालको संयोजनमा अनुसन्धान, प्रस्ताव तथा फण्डिङ कमिटी गठन गरेको छ। त्यसैगरी, एनआइसी युरोप समन्वय समितिका सदस्यहरूमा सोसाइटी अफ नेप्लिज इञ्जिनियर्स युकेका अध्यक्ष संयुक्त श्रेष्ठ, एनआरएनए बेलायतकी महिला संयोजक प्रशुना कँडेल, एनआरएनए अष्ट्रियाकी महिला संयोजक सम्झना बोहरा तथा पत्रकार अनुराधा पौडेल (फ्रान्स) रहेका छन्।
भर्चुअल माध्यमबाट बसेको बैठकलाई सम्बोधन गर्दै राष्ट्रिय आविष्कार केन्द्रका अध्यक्ष महावीर पुनले कोरोना संकटभन्दा पहिले नै ३२ किसिमका विभिन्न आइडियाहरू केन्द्रमा आएको बताए।
पुनले व्यापारीकरण हुने सम्भावना रहेका परियाजनाहरूलाई आफूहरूले अगाडि बढाउन चाहेको जानकारी दिए। उनले युरोपमा रहेका नेपालीहरूलाई समयको दान, आइडियाको दान र आर्थिक दान दिन आग्रह गरे।
‘आविष्कार केन्द्र नेपालका लागि कति महत्त्वपूर्ण छ भन्ने धेरै नेपालीलाई थाहा छैन, त्यसैले यसको प्रचारप्रसार गर्नुपर्छ,’ पुनले भने।
