पाकिस्तानमा गोली हानी ४ टिकटकरहरुको हत्या गरिएको छ। हत्या गरिएका ४ जनामध्ये एक महिला पनि रहेको बताइएको छ। पाकिस्तानी अखबार डनका अनुसार मंगलबार बिहान पाकिस्तानको कराचीमा उनीहरुको हत्या भएको हो।
हत्या हुनेमा मुस्कान, आमिर र उनका दुई साथी रहेका एसएसपी सरफराज नवाज शेखले जानकारी दिए। अधिकारीका अनुसार मुस्कानले आमिरलाई सोमबार राती भेट्नका लागि बोलाएकी थिइन्। आमिरले एउटा गाडीको व्यवस्था गरेर आफ्ना साथीहरु रेहान र सज्जादलाई पनि साथमै लिएर मुस्कानलाई भेट्न गएका थिए। चारै जना मिलेर टिकटक बनाइरहेका बेला उनीहरुको हत्या भएको हो।
महिलालाई कारभित्र र तीन जनालाई कारबाहिर गोली प्रहार गरिएको थियो। गोली लागेर गम्भीर भएका उनीहरुलाई अस्पताल लगिएको भए पनि उनीहरुको मृत्यु भइसकेको थियो। आपसी मतभेदका कारण हत्या भएको हुन सक्ने प्रहरीले आशंका गरेको छ। हत्यामा कसको संलग्नता छ भनेर अनुसन्धान गरिरहेको एसएसपी शेखले जानकारी दिएका छन्।
