भारतमा मंगलबार ११ हजार ६ सय १० जना थप व्यक्तिमा कोभिड–१९ संक्रमण भएपछि कुल संक्रमितको संख्या सम्म एक करोड ९ लाख ३७ हजार भन्दा बढी पुगेको भारतीय स्वास्थ्य तथा परिवार कल्याण मन्त्रालयले बुधबार जनाएको छ। साथै कोभिड–१९ संक्रमित मध्ये एक लाख ५५ हजार ९ सय १३ जनाको मृत्यु भएको छ।
भारतमा हाल सक्रिय संक्रमितको संख्या एक लाख ३६ हजार रहेको छ भने एक करोड ६ लाख व्यक्ति संक्रमणमुक्त भइसकेका छन्। भारतमा कोभिड–१९ विरुद्ध गत जनवरी १६ देखि राष्ट्रव्यापी खोप अभियान शुरु गरेको थियो। देशभर करिब ९० लाख व्यक्तिले खोप लिइसकेका छन्। जसमा मुख्यगरी स्वास्थ्यकर्मीहरु रहेका छन्।
यसैबीच, मंगलबारसम्म भारतमा करिब २१ करोड नमुना परीक्षण गरिएको छ। पछिल्लो पटक आइतबार एक दिन छ लाख ४४ हजार नमुना परीक्षण गरिएको भारतीय स्वास्थ्य अनुसन्धान परिषदले जनाएको छ। भारतमा हाल सेरम इन्स्टिच्युटले उत्पादन गरेको कोभिशिल्ड र भारत बायोटेक इन्टरनेसनलले उत्पादन गरेको कोभाक्सिन खोप प्रयोगमा ल्याइएको छ।
विश्वभर कोभिड–१९ बाट करिब ११ करोड भन्दा बढी व्यक्ति संक्रमित भएका छन्। विश्व स्वास्थ्य संगठनका अनुसार संक्रमितमध्ये करिब २४ लाख ३० हजार व्यक्तिको ज्यान गएको छ। संयुक्तराज्य अमेरिकामा चार लाख ९९ हजार, ब्राजिलमा दुई लाख ४० हजार, मेक्सिकोमा एक लाख ७५ हजार, बेलायतमा एक लाख १८ हजार, इटालीमा ९४ हजार र फ्रान्समा ८२ हजारको मृत्यु भइसकेको छ।
कोरोना भाइरसको उत्पत्ति भएको भनिएको चीनमा भने चार हजार ६ सय ३६ जनाको मृत्यु भएको थियो। कोभिड–१९ विश्वका २२१ वटा मुलुक एवं क्षेत्रमा फैलिएको पाइएको छ। विश्वभर अझै पनि करिब ९८ हजार व्यक्ति गम्भीर अवस्थामा रहेर उपचार गराइरहेका छन्।
