युरोपा लिगको राउन्ड अफ ३२ को पहिलो लेगमा इंग्लिस क्लब टोटेनहम हट्स्परले अष्ट्रियन क्लब वल्फ्सवर्गर एसीलाई पाजित गरेको छ। गय राति भएको खेलमा हट्स्परले वल्फ्सवर्गर एसीलाई उसकै मैदानमा ४–१ गोलले पराजित गरेको हो।
टोटेनहमलाई जीत दिलाउन ह्युङ मिन सन, ग्यारेथ बेल, लुकास मोउरा र कार्लाेस भिनिसियसले गोल गरेका थिए। घरेलु टोलीका माइकल लिइन्डिलले सान्त्वना गोल गरे।
खेलको १३औं मिनेटमा ह्युङ मिन सनले टोटेनहमलाई शुरुवाती अग्रता दिलाए। खेलको २८औं मिनेटमा बेलले गोल गर्दै टोटेनहमको अग्रता दोब्बर बनाए। ३४औं मिनेटमा लुकास मोउराले गोल गर्दा टोटेनहमले ३–० को अग्रता बनायो। ५५औं मिनेटमा माइकल लिइन्डिलले पेनाल्टीमार्फत गोल गर्दै खेललाई ३–१ को अवस्थामा ल्याए। ८८औं मिनेटमा कार्लाेस भिनिसियसले इरिक लमेलाको पासमा गोल गर्दै टोटेनहमलाई ४–१ को जित दिलाए।
त्यस्तै, म्यानचेस्टर युनाइटेडले युरोपा लिगको अन्तिम ३२ को पहिलो लेगमा स्पेनिस क्लब रियल सोसिडाडलाई ४–० ले पराजित गरेको छ। युनाइटेडको लागि पोर्चुगिज मिडफिल्डर ब्रुनो फर्नान्डेसले दुई तथा मार्कुस रासफोर्ड र ड्यानियल जेम्सको एक–एक गोल गरे।
युनाइटेडले खेलको २७औं मिनेटमा ब्रुनो फर्नान्डेसको गोलबाट अग्रता लिएको थियो। ५७औं मिनेटमा ब्रुनोले व्यक्तिगत दोस्रो गोल गर्दै युनाइटेडको अग्रता दोब्बर बनाए। ६५औं मिनेटमा मार्कुस रासफोर्डले गोल गर्दै युनाइटेडलाई सहज जिततर्फ अघि बढाए। ९०औं मिनेटमा इरिक बेइलीको पासमा ड्यानियल जेम्सले गोल गर्दै युनाइटेडलाई ४–० को जीत पक्क गरे।
