नेत्रविक्रम चन्द विप्लव नेतृत्वकाे नेकपाका सप्तरी जनसत्ता प्रमुखसहित तीन कार्यकर्ता प्रकाउ परेका छन्। सप्तरी प्रहरीले उनीहरुलाई पक्राउ गरेको हो।
आर्थिक सहयोगको पत्रसहित सप्तरी जिल्ला जनसत्ता प्रमुख सप्तरी खड्क नगरपालिका–३ बनरझुल्ला टोलका ५२ वर्षीय आदर्श उपनामका रामनाथ मण्डलसहित तीन जना पक्राउ परेको जिल्ला प्रहरी कार्यालय सप्तरीले जानकारी दिएको छ।
पक्राउ पर्नेमा सिरहा–सप्तरी जिल्ला सदस्य राजविराज नगरपालिका–४ का उदयनाथ मण्डल र विष्णुपुर गाउँपालिका–१ का २५ वर्षीय रामकृष्ण मण्डल रहेका छन्। प्रहरीले उनीहरुको साथबाट विभिन्न किताब तथा सामाग्रीहरु बरामद पनि गरेको छ।
सप्तरी जिल्लामा केही समयदेखि विभिन्न व्यवसायी, कार्यालय प्रमुख तथा जनप्रतिनिधिसँग चन्दा माग गर्ने, धाक धम्की दिने गरेको सूचनाका आधारमा अनुसन्धान पश्चात उनीहरूलाई पक्राउ गरिएको हो।
