नेपाली कांग्रेसका वरिष्ठ नेता रामचन्द्र पौडेलले लोकतन्त्र र कांग्रेस संकटमा रहेको बताएका छन्। बागलुङमा नेपाल शिक्षक संघले आज आयोजना गरेको गण्डकी प्रदेशस्तरीय दोस्रो र तेस्रो प्रतिनिधिसभालाई सम्बोधन गर्दै नेता पौडेलले कांग्रेस आन्तरिक किचलोमा फसेको बताउँदै सबै मिलेर पार्टीलाई जनताको पहिलो पार्टी बनाउनुपर्ने बताए।
‘लोकतन्त्र र कांग्रेस संकटमा छ, जसका कारण नेपाल नै संकटमा धकेलिन थाल्या’, पौडेलले भने, ‘कांग्रेसले समीक्षा गर्ने बेला आएको छ, देश जोगाउन पहिला कांग्रेस सच्चिन आवश्यक रहेको छ।’ उनले पार्टी सभापति शेरबहादुर देउवाप्रति लक्षित गर्दै कांग्रेस कसका कारण सकिँदैछ भन्ने कुरा छर्लङ्ग भएको बताए।
कम्युनिष्ट फुटेर चिराचिरा पर्दासमेत कांग्रेसप्रति जनता आउन नसक्नुका पछाडि कांग्रेसको नेतृत्व नै कमजोरी रहेको भन्दै अब सच्चिएर जानुपर्ने नेता पौडेलको धारणा छ। कांग्रेसको उपचार माथिबाट नभएर तलबाटै गर्न आवश्यक रहेको पनि उनले उल्लेख गरे।
‘अब माथिबाट कांग्रेस सुध्रिन्नजस्तो छ,’ पौडेलले भने, ‘जनस्तरबाटै उपचार विधि खोजौं।’ उनले राष्ट्रको संकट बचाउन कांग्रेस सक्षम भए पनि आन्तरिक किचलो अन्त्य गर्न आवश्यक रहेको बताए। उनले देशको हित हुन्छ भने देउवाको नेतृत्वमा कांग्रेस सरकारमा जान तयार रहेको जानकारी दिए।
शिक्षकले विद्यार्थीलाई संविधान पढाउन सक्नुपर्ने भन्दै संविधान पढाएपछि कांग्रेसमा आउ भन्नै नपर्ने उनको तर्क छ। यसो भन्दैमा विद्यालयलाई राजनीति गर्ने थलो नगराउन नेता पौडेलले आग्रह पनि गरेका छन्।
