नेपाल कम्युनिष्ट पार्टी एमालेको झलनाथ खनाल र माधवकुमार नेपाल समूहको राष्ट्रिय भेला बुधबारबाट शुरु भएको छ। उक्त भेलालाई सम्बोधन गर्दै नेकपाकी उपाध्यक्ष अष्टलक्ष्मी शाक्यले प्रधानमन्त्री तथा नेकपा अध्यक्ष केपी शर्मा अोलीलाई पनि राष्ट्रिय भेलामा सहभागी हुन आग्रह गरेकी छिन्।
उनले फागुन २८ गतेका गरेका निर्णयहरु फिर्ता लिएर भेलामा आउन निम्तो दिएकी हुन्। यो भेला एमालेको आधिकारीक भेला भएको बताउँदै उनले गुटको भेलाबाट गरेको निर्णयलाई फिर्ता लिन आग्रह गरेकी हुन्। भेलामा सहभागी हुनेलाई कारबाही गर्ने अध्यक्ष ओलीको चेतावनीलाई लक्षित गर्दै उनले पार्टीले आयोजना गरेको भेलामा आउनको लागि कोही आत्तिनु र डराउनु नपर्ने बताइन्।
नेतृ शाक्यले आफूहरु एमालेलाई बलियो बनाउन लागेको स्पष्ट पारिन्। ‘हामी नेकपा एमालेलाई बलियो बनाउन चाहान्छौं। सुदृढ बनाउन चाहन्छौं,’ उनले भनिन्, ‘अझ एकीकृत बनाउन चाहन्छौं। देशको आर्थिक सामाजिक रुपान्तरणको दिशामा नेतृत्व गर्न चाहन्छौ। समाजवादको लक्ष्य प्राप्त गर्न चाहन्छौं।’
