त्रिभुवन आर्मी क्लब र किर्गिस्तानबीच आज दशरथ रंगशालामा मैत्रीपूर्ण फुटबल खेल हुँदैछ। एएफसी कप २०२१ प्ले अफको तयारीमा जुटेको नेपाली सेनाको त्रिभुवन आर्मी क्लब र किर्गिस्तानको यू–२३ टीमबीच मैत्रीपूर्ण फुटबल खेल हुन लागेको हो।
त्रिभुवन आर्मीका जर्जप्रीन्स कार्कीको कप्तानीमा दिउँसो ३ः३० बजे हुने उक्त खेल रंगशाला पुग्ने जो सुकैले निःशुल्क हेर्न सक्ने व्यवस्था मिलाइएको सेनाले जानकारी दिएको छ। त्रिभुवन आर्मी क्लब नेपालको च्याम्पियनशीप विभागीय टीम हो।
कीर्गिस्तानको ओलम्पिक टोली थ्री–नेसन्स कपको लागि नेपाल आएको थियो। समूह चरणको पहिलो खेलमा बंगलादेशसँग १–० गोलले पराजित कीर्गिज टोली दोस्रो खेलमा नेपालसँग बराबरी गर्दै प्रतियोगिताबाट बाहिरिएको थियो।
