सिरहाको लहानमा एकजना सुनचाँदी व्यवसायीको हत्या भएको छ। शनिबार राति १ बजेतिर लुटपाट गर्न आएको समूहले धाारिलो हतियार र गोली प्रहार गरी ४५ वर्षीय प्रदीप मिझारको हत्या गरेका हुन्।
टाउको, अनुहार र हातमा खुकुरीले प्रहार गरी छातीमा गोलीसमेत प्रहार गर्दा मिझार गम्भीर घाइते भएका थिए। उनलाई तत्काल लहानस्थित सप्तऋषि अस्पतालमा उपचारका लागि लगिए पनि मृत्यु भएको सिरहा प्रहरीले जानकारी दिएको छ।
लुटेरा समूहले मृतककी श्रीमती ३५ वर्षीया अनिताकुमारी दुलाललाई समेत दाहिने हातमा खुकुरी प्रहार गरी घाइते बनाएका छन्। घटनामा संलग्न रहेको आरोपमा दुई जना पक्राउ परेका छन्। पक्राउ पर्नेमा सिरहा लहान नगरपालिका ७ बस्ने २६ वर्षीय रामकृष्ण चौधरी र लहान नगरपालिका २३ गढिया बस्ने २९ वर्षीय सूर्य सहनी रहेका छन्।
घटनाको सम्बन्धमा थप अनुसन्धान भइरहेको प्रहरीले जानकारी दिएको छ।
