प्रधानमन्त्री एवं नेकपा एमालेका अध्यक्ष केपी शर्मा ओलीले नेकपा माओवादी केन्द्रका अध्यक्ष पुष्पकमल दाहाल प्रचण्डलाई फोन गरेका छन्।
कोन्ज्योसोम गाउँपालिकाको भवन उद्घाटन गर्न ललितपुर पुगेका बेला अध्यक्ष प्रचण्डलाई ओलीले फोन गरेका हुन्।
भवन उद्घाटनपछि कार्यक्रमलाई सम्बोधन गर्दै प्रचण्डले ओलीको फोन आएको जानकारी गराए। ‘म यहाँ बस्दै गर्दा प्रधानमन्त्री केपी शर्मा ओलीको फोन आयो धेरै समयपछि, म एउटा गाउँपालिकाको भवन उद्घाटन गर्दैछु भनेँ,’ प्रचण्डले भने।
कार्यक्रम सकिएपछि प्रधानमन्त्री ओलीसँग कुरा गर्ने बताउँदै प्रचण्डले कोन्ज्योसोमको बाटो निर्माणका लागि आग्रह गर्ने बताए। ‘यो बाटो बनाइदिनुस् भन्नेवाला छु,’ उनले भने।
प्रचण्डले पूर्वाधार विकासमा सहयोग गर्ने बचन दिएका छन्। प्रचण्ड र ओलीबीच लामो समयपछि फोन संवाद भएको हो।
