भारत उत्तर प्रदेशको कानपुरमा सम्बन्धलाई नै लज्जास्पद बनाउने घटना बाहिर आएको छ। कानपुरमा एक छोराले कोरोनाको डरका कारण आफ्नी वृद्ध आमालाई घरबाट निकालिदिए। आफ्नै छोराले घरबाट निकालेपछि बिरामी अवस्थाकी ती महिला खुल्ला आकाशमुनि जमिनमा सुतिरहेको बेलामा कसैले उनको भिडियो खिच्यो।
त्यो भिडियो सामाजिक सञ्जालमा भाइरल भएपछि स्थानिय प्रहरीले त्यसमा चासो देखायो। महिलाबारे जानकारी पाएलगत्तै प्रहरीले महिलाको उद्दार गरेर उनलाई अस्पतालमा भर्ना गर्याे। प्रहरीका अनुसार उपचारको क्रममा वृद्ध महिलाको मृत्यु भयो।
यो घटना कानपुर केन्ट थाना क्षेत्रको हो, आरोप याे छ कि एक व्यक्तिको आमाको स्वास्थ्यअवस्था अचानक एकदमै बिग्रियो र आरोपी छोराले आमाको उपचार गराउनुको सट्टा आफ्नी दिदीको घर अगाडिको सडकमा छोडी दिए।
चिकित्सकको भरपुर प्रयासको बावजुद पनि उनले मृत्यूवरण गरिन्। मृत्युपछि गरिएको जाँचबाट ती वृद्धलाई कोरोना संक्रमण भएको खुल्न आयो। यस्तो स्थितिमा घरको कुनै सदस्यले पनि उनलाई सहारा दिएनन्। र घरबाट निकालिदिए। प्रहरीका अनुसार वृद्ध महिलाको शव लिन समेत कोही गएका छैनन्।
स्थानीय प्रहरी अधिकारी अनुप सिंह भन्छन्, ‘सामाजिक सञ्जालमा एक वृद्ध महिलाको भिडियो भाइरल भइरहेको थियो। जसमा एक वृद्ध महिला पछ्यौरा ओडेर सडकमा पल्टिएकी थिइन्। हामीले भिडियो हेरेपछि उनको तत्काल उद्दार गर्यौं। पछि थाहा भयो उनलाई घरबाट निकालिएको रहेछ। घटनाबारे हामी थप अनुसन्धान गर्दैछौं र कारबाहीको प्रकृया अघि बढाएका छौं।’
