युईएफ च्याम्पियन्स लिग फुटबलको सेमिफाइनल खेलको पहिलो लेगमा रियल मड्रिड र चेल्सीले बराबरी खेलेका छन्। रियलको घरेलु मैदानमा भएको खेलमा पाहुना टोली चेल्सीले शुरुवाती अग्रता बनाए पनि त्यसलाई जोगाउन सकेन।
यी दुई टोलीबीचको दोस्रो लेग चेल्सीको घरेलु मैदानमा नेपाली समयअनुसार बैशाख २२ गते बुधबार राति १२ः४५ बजे हुनेछ। चेल्सीका मुख्य प्रशिक्षक थोमस टुचेलले उक्त खेलमा रियलविरुद्ध चेल्सी प्रत्येक सेकेण्ड लड्ने बताएका छन्।
‘यो हाफ समय मात्र हो। हामीले प्रत्येक सेकेण्ड लड्नुपर्नेछ,’ उनले भने, ‘हामी प्रत्येक मौकाको फाइदा उठाउने प्रयास गर्नेछौं। मलाई पहिलो लेग जितेको जस्तो अनुभूति भएको छ। हामीले पहिलो हाफको जीतका लागि हामी लायक छौं।’
