इंग्लिस प्रिमियर लिगमा शनिबार राति म्यानचेस्टर सिटी र चेल्सीबीच प्रतिस्पर्धा हुँदैछ। खेल नेपाली समयअनुसार राति १०ः१५ म्यानचेस्टर सिटीको घरेलु मैदानमा हुँदैछ।
सिटी र चेल्सी युईएफ च्याम्पियन्स लिग फुटबलको यस सिजनकाे दुई फाइनलिस्ट टाेली पनि हुन्। च्याम्पियन्स लिगको उपाधिका लागि दुई टोलीबीच मे ३० मा महाभिडन्त हुँदैछ। शनिबारको खेलमा चेल्सीविरूद्ध सिटी विजयी भएमा सिटीले इंग्लिस प्रिमियर लिगको उपाधि जित्नेछ।
चेल्सी हाल तालिकाको चौथो स्थानमा छ। चेल्सी विजयी भएमा पाँचौं स्थानको टोलीसँग अंक अग्रता बढाउने छ। च्याम्पियन्स लिगमा सिटीसँग फाइनल खेल्न बाँकी रहेकाले पनि चेल्सी आजको खेलमा जित निकाल्ने लक्ष्यमा छ।
शनिबारको खेलमा विजयी भएमा चेल्सीको मनोबल उच्च हुने र च्याम्पियन्स लिगको उपाधि भिडन्तमा उत्कृष्ट खेल पस्किन सकिने चेल्सीका प्रशिक्षकको बुझाई छ। सिटीविरूद्ध जित निकालेमा सिटीकाे मनाेबल घट्ने र त्यसकाे फाइदा च्याम्पियन्स लिगकाे फाइनलमा उठाउने चेल्सीकाे दाउ छ।
