नेपालको राजनिती सधै तरल नै रह्यो। तत्कालिन नेकपाको बिवादले यो तरलताले फेरी एकपटक मुलुकको राजनिती अस्थिर बन्यो। नेकपा फुट्यो, नेकपा एमाले र नेकपा (माअोवादी केन्द्र) लाई पुरानै अवस्थामा फर्किए, केपी शर्मा ओली र माधव कुमार नेपालवीच पानी बाराबारको स्थितीसम्म बन्यो, ओली सरकार ढल्यो, ओली फेरी प्रधनमन्त्री नियुक्त भए, जसपामा पार्टीविभाजनसम्मको अवस्था बनिसक्यो। तर, अझै पनि राजनितीक स्थिरता भने आइसकेको छैन्।
यसैवीच माओवादी केन्द्रका नेता नारायणकाजी श्रेष्ठ प्रकाशले दिएको अभिव्यक्तिका कारण नयाँ तरङ्ग आएको छ। उनले केहि महिनाअघि मात्र छुट्टीएका एमाले र माओवादी केन्द्र एक हुनुपर्ने अभिव्यक्ति दिएका छन्।
माओवादी केन्द्रका नेता नारायणकाजी श्रेष्ठ प्रकाशले अझै पनि कम्युनिष्ट पार्टीहरुबीच एकता आवश्यक रहेको बताए। नेकपाको एकतामा बिदेशी शक्तिले भाँजो हालेको उनको कथन छ।
एमाले र माओवादी केन्द्रले राजनीतिक परिवर्तनको रक्षा गरी राष्ट्रिय स्वाधीनता सुदृढ गर्ने, सामाजिक–आर्थिक रुपान्तरण गर्ने र समाजवाद स्थापना गर्ने लक्ष्यका साथ पार्टी एकता गरेको भए पनि देशी विदेशी शक्तिको योजनामा फुटाइएको उनले दाबी गरे।
‘हाम्रो उद्देश्यलाई कायमै राख्नुपर्छ’ सोमबार न्यूज एजेन्सी नेपालसँग कुरा गर्दै माओवादी केन्द्रका नेता श्रेष्ठले भने, ‘पार्टी एकता एकचोटि विदेशी र देशभित्रका पार्टी एकताको मर्म नबुझ्ने र जनताप्रति गम्भीर र इमान्दार नहुने प्रवृत्तिले पार्टी एकतालाई विभाजनमा पुर्यायो भनेर कम्युनिष्टहरुको एकता काम नलाग्दो रहेछ भन्ने सोच्नु गलत हुन्छ।’
समयमै विभिन्न विषयमा ध्यान दिन नसक्नु कमजोरी भएको र कमजोरी सच्याउन खोज्दा पार्टी विभाजन भएको उनले बताए। यद्यपि कम्युनिष्ट पार्टीहरुबीचको एकीकरण गर्न आफूहरुले हिम्मत नहार्ने माओवादी केन्द्रका नेता श्रेष्ठले बताए।
‘कमजोरी सच्याउने प्रयत्न गर्दा विदेशी र यहाँभित्रको प्रतिगामी शक्तिका कारण नकारात्मक चुनौतीको सामना गर्नुपरेको छ। तर हामी हिम्मत हार्दैनौं’ उनले भने, ‘कम्युनिष्टहरुले हिम्मत हार्नुहुँदैन। हामीले बाह्य शक्तिहरुको हस्तक्षेपबाट देशको स्वाधीनताको रक्षा गर्ने, प्रतिगमनको दिशातिर देशलाई लैजान नदिने, कम्युनिष्ट आन्दोलनलाई फेरि एकीकरण गर्ने दिशातिर लैजाने तर त्यसको निम्ति पहिला वैचारिक, राजनीतिक लाइनमा प्रष्टता हासिल गर्ने।’
