पछिल्लो समय नेपालमा कोरोना भाइरसबाट सङ्क्रमित हुनेको सङ्ख्या र मृत्युदर घट्दै गएको छ। पाँच दिनअघि सङ्क्रमितको सङ्ख्या छ हजार ७ सय ४१ रहेकामा आज सो सङ्ख्या घटेर चार हजार ३ सय ६९ रहेको छ।
यस्तै पाँच दिनअघि कोरोनाबाट ज्यान गुमाउनेको सङ्ख्या एक सय ४५ रहेकामा आज सो सङ्ख्या घटेर एक सय ९ पुगेको छ। यही जेठ १ गते कोरोना सङ्क्रमितको सङ्ख्या आठ हजार १ सय ६७ रहेको थियो भने कोरोनाबाट ज्यान गुमाउनेको सङ्ख्या १८७ थियो। जेठ ३ गते नेपालमा हालसम्मकै बढी नौ हजार २ सय ४७ जना कोरोनाबाट सङ्क्रमित भएका थिए। सो दिन कोरोनाबाट ज्यान गुमाउनेको सङ्ख्या भने २सय १४ रहेको थियो।
जेठ ५ गते कोरोनाबाट नेपालमा हालसम्मकै बढी २ सय ४६ जनाको मृत्यु भएको थियो। त्यसयता मृत्युदर भने लगातार घट्दै गएको स्वास्थ्य तथा जनसङ्ख्या मन्त्रालयले सार्वजनिक गरेको तथ्याङ्कमा उल्लेख छ। मन्त्रालयका अनुसार पछिल्लो समय १० हजार ९ सय ८६ जनाको पिसिआर परीक्षण तथा एक हजार ७ सय ८४ जनाको एन्टिजेन विधिबाट कोरोना परीक्षण गरिएको थियो।
पिसिआर विधिबाट तीन हजार ७ सय २ तथा एन्टिजेनबाट ६ सय ६७ जनामा सङ्क्रमण पुष्टि भएको हो। यो सँगै कोरोना सङ्क्रमितको सङ्ख्या नेपालमा पाँच लाख ५३ हजार ४ सय २२ पुगेको छ। हाल ७सय ६३ सङ्क्रमित क्वारेन्टिनमा रहेको मन्त्रालयले जनाएको छ।हालसम्म चार लाख ४० हजार ९ सय ५५ जना कोरोना भाइरसबाट मुक्त भई घर फर्किएका छन्।
पछिल्लो २४ घण्टामा देशभर छ हजार २ सय ५ सङ्क्रमित निको भएर घर फर्किएका छन्। निको हुने दर ७९ दशमलव २ प्रतिशत रहेको मन्त्रालयले जनाएको छ। हाल देशभर एक लाख आठ हजार ८ सय ९७ सक्रिय सङ्क्रमित रहेका छन्। पिसिआर परीक्षण गराउनेको सङ्ख्या ३० लाख ४२ हजार ३ सय ६९ पुगेको छ।
काठमाडौँ उपत्यकामा पनि घट्दै सङ्क्रमितको सङ्ख्या
काठमाडौँ उपत्यकामा पनि पछिल्लो समय कोरोना सङ्क्रमितको सङ्ख्या घट्दै गएको छ। यही जेठ ९ गते उपत्यकामा कोरोना सङ्क्रमितको सङ्ख्या दुई हजार ८ सय २१ रहेकामा आज सो सङ्ख्या घटेर एक हजार ९३ पुगेको छ। मन्त्रालयका अनुसार काठमाडौँमा ८ सय ४, ललितपुरमा १ सय ६८ तथा भक्तपुरमा १ सय १३ जनामा सङ्क्रमण पुष्टि भएको छ। काठमाडौँमा हाल सक्रिय सङ्क्रमितको सङ्ख्या १५ हजार ३ सय ७७ रहेको छ।
हालसम्म कोरोनाबाट एक लाख ७० हजार ३ सय ६२ सङ्क्रमित निको भएका छन् भने एक हजार ५ सय ९९ सङ्क्रमितको मृत्यु भएको छ। यस्तै ललितपुरमा हाल छ हजार ५ सय २५ सक्रिय सङ्क्रमित रहेका छन्। हालसम्म २६ हजार १ सय २५ सङ्क्रमित निको भएका छन् भने कोरोनाबाट ४ सय ३० सङ्क्रमितको मृत्यु भएको छ। यसैगरी भक्तपुरमा चार हजार ५ सय १ सक्रिय सङ्क्रमित छन्। निको हुनेको सङ्ख्या १४ हजार ९ सय ६६ रहेको छ भने ३ सय २१ सङ्क्रमितले ज्यान गुमाएको मन्त्रालयले जनाएको छ।
