कोरोनाभाइरस महामारीको दोस्रो लहरबाट उच्च प्रभावित भारतमा पछिल्ला केही दिनदेखि संक्रमण दरमा कमी आएको छ। गत मे ९ तारिखमा एकै दिन चारलाख भन्दा बढी संक्रमित फेला पारिएकामा पछिल्लो २४ घण्टामा त्यो संख्या घटेर एक लाख ५२ हजार ७ सय ३४ जना मात्र देखिएको भारतीय स्वास्थ्य तथा परिवार कल्याण मन्त्रालयले जनाएको हाे।
याे सँग देशभर हालसम्म कूल २ करोड ८० लाख ४७ हजार ५ सय ३४ व्यक्ति कोरोना संक्रमित भएका छन् भने २० लाख २६ हजार ९२ व्यक्ति सक्रिय संक्रमित अवस्थामा छन्। विगत २४ घण्टामा २ लाख ३८ हजार २२ ब्यक्ति कोभिडबाट संक्रमणमुक्त भएका छन्।
तर भारतमा दैनिक मृत्यु दरमा भने सोचेजति कमी आएको छैन। मन्त्रालयले सोमबार सार्वजनिक गरेको विवरणमा २४ घण्टाको अवधिमा ३ हजार १ सय २८ जनाको कोभिड–१९ को संक्रमणबाट मृत्यु भएको उल्लेख छ। यो सहित भारतमा हालसम्म कोभिड–१९ को संक्रमणबाट ३ लाख २९ हजार १०० जनाको ज्यान गएको छ।
त्यस्तै भारतमा हालसम्म ३४ लाख ३१ हजार ५४ हजार व्यक्तिको कोरोना परिक्षण गरिएको सरकारी स्रोतले जानकारी दिएको छ। भारतमा गत जनवरी १६ तारिखबाट कोरोनाविरुद्ध खोप अभियान शुरु भएको थियो। मन्त्रालयका अनुसार हालसम्म कूल २१ करोड ३१ लाख ५४ हजार डोज खोप लगाइएको छ।
