पछिल्लो केही दिनयता नेपालमा कोरोना भाइरसबाट सङ्क्रमित हुनेको सङ्ख्या क्रमश घट्दै गएको छ। छ दिनअघि सङ्क्रमितको सङ्ख्या छ हजार ७ सय ४१ रहेकामा आज सो सङ्ख्या घटेर चार हजार ७ सय ६२ जनामा सङ्क्रमण पुष्टि भएको छ।
आज १५ हजार ५५ पिसिआर र दुई हजार ४ सय २५ एन्टीजेन गरी कुल १७ हजार ४ सय ८० नमूना परीक्षण गरिएकाे थियाे। नेपालमा हालसम्म पाँच लाख ६१ हजार ३ सय २ जनामा सङ्क्रमण पुष्टि भएको मन्त्रालयले जनाएको छ। सङ्क्रमितमध्ये चार लाख ४७ हजार ४ सय ४६ जना सङ्क्रमणमुक्त भएका छन्। कोरोनामुक्त हुनेको दर ७९.७ प्रतिशत रहेको छ। एक लाख ६ हजार ४ सय ७० सङ्क्रमित आइसोलेनसमा छन्। आज छ हजार ४ सय ९१ जना सङ्क्रमणमुक्त भएका छन्।
पछिल्ला समय कोरोना सङ्क्रमणदरमा कमी आए पनि मृत्युदर भने अझै घट्न सकेको छैन। स्वास्थ्य तथा जनसङ्ख्या मन्त्रायका अनुसार अझै पनि कोरोनाबाट दैनिक मृत्यु हुनेको सङ्ख्या १०० भन्दा बढी नै छ। पछिल्ला साता लगातार सङ्क्रमणमा कमी आएको भएपनि कोरोनाबाट हुने मृत्यु उल्लेख्य घट्न सकेको छैन।
मन्त्रालयका अनुसार पछिल्ला २४ घन्टामा कोरोनाबाट एक सय १४ जनाले ज्यान गुमाएका छन्। नेपालमा हालसम्म कोरोना सङ्क्रमणबाट सात हजार ३ सय ८६ को ज्यान गएको छ। सङ्क्रमण दरमा केही कमी देखिएको भएपनि अधिकांश सङ्क्रमित होम आइसोलेनमा रहेका र स्वास्थ्य अवस्था जटिल भएपछि मात्र अस्पताल आउने हुँदा मृत्युदर घट्न नसकेको चिकित्सकहरु बताउँछन्।
