पछिल्लो २४ घण्टामा कोरोनाबाट सङ्क्रमित हुनेभन्दा निको हुनेको सङ्ख्या दोब्बर देखिएको छ। स्वास्थ्य तथा जनसङ्ख्या मन्त्रालयका अनुसार कूल १३ हजार ७ सय ३३ नमूना परीक्षण गरिएकामा तीन हजार ४७९ मात्रै सङ्क्रमित भएका छन्। यस्तै निको हुनेको सङ्ख्या छ हजार ६ सय ३६ रहेको छ।
मन्त्रालयको विवरणअनुसार कूल १० हजार ४ सय ७१ पिसिआर विधिबाट परीक्षण गरिएको छ भने तीन हजार २ सय ६२ भने एन्टिजेन विधिबाट परीक्षण गरिएको छ। नेपाली सेनाले विभिन्न मितिमा शव व्यवस्थापन गरेका समेत कूल ९९ जनाको दुःखद् निधन भएको छ। यो सङ्ख्यासहित हालसम्म कूल सात हजार ८ सय ९८ जनाको कोरोनाका कारण निधन भएको छ।
मन्त्रालयका अनुसार हालसम्म कूल पाँच लाख ८८ हजार १ सय २४ जनामा कोरोना सङ्क्रमण भएको छ भने चार लाख ९१ हजार ९ जना निको भएका छन्। मन्त्रालयका अनुसार नौ वर्ष उमेरसम्मका कूल ३५ जनाको ज्यान गएको छ। यस्तै १० देखि १९ वर्ष उमेर समूहका ३७, २० देखि २९ वर्षका २२६, ३० देखि ३९ वर्षका ६५९, ४० देखि ४९ सम्मका एक हजार १६१, ५० देखि ५९ वर्ष उमेर समूहका एक हजार ५६४ र ६० वर्षभन्दा माथिका कूल चार हजार २१६ जनाको कोरोनाका कारण निधन भएको छ।
काठमाडौँ उपत्यकाका तीन जिल्लामध्ये काठमाडौँमा १२ हजार ६७२ जना सक्रिय कोरोना सक्रमित छन्। कूल एक लाख ७९ हजार ८ सय ७२ निको भएका छन् भने एक हजार ६९४ जनाको निधन भएको छ। यस्तै, भक्तपुरमा कूल तीन हजार ८ सय १२ सक्रिय सक्रमित रहँदा १६ हजार ६ सय ९२ जना निको भएका छन् भने ३३७ जनाको निधन भएको छ। यस्तै, ललितपुरमा चार हजार ९ सउ ४३ सक्रिय सङ्क्रमित हुँदा २९ हजार ४ सय ८८ निको भएका छन्। यस्तै, सो जिल्लामा कोरोनाका कारण ४ सय ८२ जनाको निधन भएको छ।
