भारतमा कोरोनाभाइरसबाट थप झण्डै ४६ हजार मानिस सङ्क्रमित भएका छन्। सरकारी अधिकारीहरुले दिएको जानकारी अनुसार पछिल्लो २४ घण्टामा थप ४५ हजार ९ सय ५१ जना सङ्क्रमित भएका हुन्।
भारतमा लामो समयदेखि दैनिक ४० हजारभन्दा बढी सङ्क्रमितहरु थपिदै आएका छन्। अघिल्लो दिनको तुलनामा बुधबार सार्वजनिक गरिएको तथ्याङ्कमा केही बढी देखिएको सरकारी अधिकारीहरुले जनाएका छन्। अघिल्लो दिन ३७ हजार ५ सय ६६ जना नयाँ सङ्क्रमित थपिएको विवरण संघीय स्वास्थ्य तथा परिवार कल्याण मन्त्रालयले सार्वजनिक गरेको थियो। मंगलबार सार्वजनिक गरिएको तथ्याङ्कमा १०२ दिनपछिकै सवैभन्दा कम सङ्क्रमितहरु भएको देखिएको थियो।
मन्त्रालयका अनुसार पछिल्लो २४ घण्टामा ६० हजार ७ सय २९ जना कोरोनाभाइरसबाट सङ्क्रमणमुक्त भएका छन्। थपिएका सङ्क्रमितहरुको सङ्ख्या भन्दा सङ्क्रमणमुक्त भएकाहरुको सङ्ख्या बढी भएकाले सङ्क्रमित अवस्थामै रहेकाहरुको सङ्ख्या पनि कम हुदै गएको छ। अहिले सङ्क्रमित अवस्थामै रहेकाहरुको सङ्ख्या पाँच लाख ३७ हजार ६४ रहेको छ।
पछिल्लो एक दिनमा भारतमा कोरोनाकै कारण ८ सय १७ जनाको मृत्यु भएको थियाे। याेसँगै भारतमा कोरोनाभाइरसका कारण अहिलेसम्म कुल मृतकको सङ्ख्या तीन लाख ९८ हजार ४ सय ५४ पुगेको मन्त्रालयले जनाएको छ।
भारतमा अहिलेसम्म कुल तीन करोड तीन लाख ६२ हजार ८ सय ४८ जना कोरोनाभाइरसबाट सङ्क्रमित भएका छन्। ती मध्ये दुई करोड ९४ लाख २७ हजार ३ सय ३० जना सङ्क्रमणमुक्त भइसकेका छन्।
