साउन १२ गतेका लागि तय नेपाली कांग्रेसको वडा अधिवेशन स्थगित भएको छ ।
पार्टी सभापतिसमेत रहेका प्रधानमन्त्री शेरबहादुर देउवाको निवास बूढानीलकण्ठमा शनिबार बसेको पदाधिकारी तथा पूर्वपदाधिकारी बैठकले वडा अधिवेशन स्थगित गरेको हो ।
कांग्रेस प्रवक्ता विश्वप्रकाश शर्माले स्थगित वडा अधिवेशन कहिले गर्ने भन्नेमा पछि निर्णय हुने बताए ।
क्रियाशील सदस्यताको टुंगो लाग्न ढिलाइ भएका कारण कांग्रेसको १४ औं महाधिवेशनको कार्यतालिका फेरि प्रभावित भएको हो ।
अब बस्ने कांग्रेस केन्द्रीय कार्यसमितिले केन्द्रीय महाधिवेशन मिति यथावत राखेर तल्लो तहका अधिवेशनहरुको कार्यतालिका हेरफेर गर्ने बताइएको छ ।
कांग्रेसले पार्टीको १४औं महाधिवेशन आगामी भदौ १६ देखि १९ गतेसम्म काठमाडौंमा गर्ने निर्णय गरेको छ ।
