आइतबार संसदको अन्तर्राष्ट्रिय सम्बन्ध समितिको बैठक बस्यो ।
त्यसमा अरुले क्रमश बोल्दै जाँदा नेकपा एमाले अध्यक्ष तथा निवर्तमान प्रधानमन्त्री केपी ओली पक्षका सांसद नादरमुनी राना बोले । राना तिनै हुन्, जसले सर्वोच्चको आदेशपछि ११ दिनमै मन्त्रीबाट हट्नुपरेको थियो । तर, संसद् पुनःस्थापना भए पनि एमालेबीच एकता भएमा पुनः मन्त्री हुन पाइने आशमा राना मन्त्री क्वाटरमै बसिरहेको थिए ।
तर, सर्वोच्चले संसद् पुनःस्थापना गर्दै कांग्रेस सभापति शेरबहादुर देउवालाई प्रधानमन्त्री नियुक्त गर्न परमादेश जारी गरेपछि रानाको मन्त्री हुने सपना चकनापुर भयो ।
जसको ‘रिस’ आइतबार बसेको संसदको अन्तर्राष्ट्रिय सम्बन्ध समितिमा रानाले पोखे । उनले संसद पुनःस्थापना र अहिलेको सरकार सर्वोच्च अदालतले बनाइदिएको भन्दै अभिव्यक्ति दिए ।
राना त्यतिमै रोकिएनन्, नेता नेपालप्रति कटाक्ष गर्न थाले । उनी अगाडि थपे, ‘आफ्नो पार्टीको प्रधानमन्त्री हुँदा घरमा गएर सुत्ने अनि संसद् चाहिन्छ भन्ने ? यो संसद् अदालतले ल्याएको हो, जनताले होइन । वरिष्ठ नेताहरूले जिम्मेवारी लिनुपर्छ ।’
रानाले सो अभिव्यक्ति दिइरहँदा एमाले वरिष्ठ नेता माधव कुमार नेपाल सुनिरहेका थिए । नेपाल पक्षका सांसदकै कारण संसद पुनःस्थापना हुँदै देउवा प्रधानमन्त्री बनेका थिए । बैठकमा बोल्दै नेपालले संघर्षबाट संसद् पुनःस्थापना भएकोमा भन्दै खुसी व्यक्त गरेका थिए ।
तर, सर्वोच्च अदालतले अहिलेको सरकार बनाइदिएको भन्ने अभिव्यक्ति दिएपछि रानाले नेपालको हप्काइ खानुपर्यो ।
नेपालले रानालाई झपार्दै भने, ‘प्रतिगमनको पक्ष लिने तपाईं बैठकबाट बाहिर जानुस् ।’ नेपाल पनि त्यतिमै रोकिएनन्, आक्रोशित हुँदै थपे, ‘तपाईंलाई मन लाग्दैन भने सांसदबाट राजीनामा दिनुस्, निस्किनुस् ।’
नेपाल मात्रै हैन, कांग्रेस, माओवादीका सांसदले समेत रानाको अभिव्यक्तिको विरोध गरे, अमर्यादित कुरा नबोल्न चेतावनी दिए ।
होहल्लामा कतिपय सांसद्हरुले प्रतिगमनका मतियारहरुलाई बैठकमा बस्ने अधिकार नभएको भन्दै रानाको कडा आलोचना गरे । कतिपय सांसदहरुले रानालाई बैठकबाट निकाल्न सभापति पवित्रा निरौलालाई आग्रह गरेका थिए । समिति सभापति पवित्रा निरौलालाई बैठक नियन्त्रणमा लिन मुस्कि गरेको थियो ।
