जनता समाजवादी पार्टी (जसपा)का अध्यक्ष उपेन्द्र यादव पक्षले कार्यकारिणी सदस्यलाई गोदावरीको रिसोर्टमा राखेको छ ।
जसपामा अहिले आधिकारिकता विवाद चलिरहेको छ । आधिकारिताको टुङ्गो लगाउन निर्वाचन आयोगले पार्टी दर्ता बखतको कार्यकारिणी सदस्यहरूको सनाखत गराउन सोमबार बिहान ११ बजे कार्यकारिणी सदस्यहरूलाई बोलाएको छ । त्यसपछि बहुमत कार्यकारिणी सदस्य उपस्थित पक्षलाई आयोगले आधिकारिकता प्रदान गर्नेछ ।
उक्त विषयमा छलफल गर्नका लागि कार्यकारिणी सदस्यहरूलाई ललितपुरको एक रिसोर्टमा राखिएको यादव पक्षका नेता इस्तियाक राईले जानकारी दिए ।
जसपा केन्द्रीय कार्यकारिणी समितिमा ५१ सदस्य रहेका छन् । तीमध्ये बहुमत ३२ कार्यकारिणी सदस्य रिसोर्टमा उपस्थित रहेको यादव पक्षले दाबी गरेको छ ।
आधिकारिकता विवाद टुङ्ग्याउन आयोगले कार्यकारिणी सदस्यको सनाखत गर्न बोलाएको अघिल्लो जसपा अध्यक्ष महन्त ठाकुर र यादव पक्ष दुबै आन्तरिक छलफलमा जुटेका छन् ।
