राष्ट्रिय सभाको बैठकमा बोल्दै एमाले सांसद देवेन्द्र दाहालले संविधानमा नै नभएको परमादेशबाट मौजूदा सरकार बनेको बताएका छन्।
केहि व्यक्तिहरुले त यो परमादेशलाई नै जनादेश भनेकाे उनले टिप्पणी गरे। उनले सरकारले आफ्नो काम कसरी गरिरहेको छ भन्ने प्रश्न गर्ने समय अहिले नभएको भए पनि यो सरकारको थालनी राम्रोसँग नभएको बताए।
‘मर्निङ सोज द डे भनेजस्तै, यो सरकारले भोलिपल्टै १० करोड दाबी गरेका एक नेतालाई १० लाखमै छोडिदिएकाले यसबारे के मूल्यांकन गर्न सकिन्छ,’ सांसद दाहालले भने, ‘भर्खरै यो सरकारले प्रधानमन्त्रीका पत्नीका बिजनेस पार्टनरलाई राज्य मन्त्रीमा नियुक्ती दिएको छ। यो प्रारम्भिक मूल्यांकन हो, यो सरकारले राम्रो हुने बाटो देखाएको छैन।’
उनले यसअघि प्रधानमन्त्री हुँदा केपी शर्मा ओलीले अगाडि सारेको योजना अब के हुने हुन् भन्ने विषयमा पनि सरकारले कुनै धारणा नदिएकाले समस्या भएको बताएका छन्।
