बुटवल — लुम्बिनी प्रदेश सभामा जनता समाजवादी पार्टी (जसपा) का तीनजना प्रदेश सभा सदस्यको पद गुमेको छ ।
प्रदेश सभा सचिवालयले शुक्रवार एक सूचना जारी गर्दै प्रदेश सभा सदस्यहरु सन्तोषकुमार पाण्डेय, विजयबहादुर यादव र कल्पना पाण्डे (लम्साल) प्रदेश सभा सदस्यबाट पदमुक्त भएको उल्लेख गरिएको छ ।
जनता समाजवादी पार्टीका प्रदेश संसदीय दलका नेता सहसराम यादव र प्रमुख सचेतक पुरमती ढेँगा मगरसहित पार्टीका नेताहरूले तीनजना सांसदलाई पार्टीले कारबाही गरेको पत्र बिहीबार प्रदेश सभा सचिवालयमा दर्ता गराएका थिए ।
प्रदेश सभाले सोही पत्रलाई आधार बनाउँदै उनीहरु सांसदको पदमा नरहेको सूचनामार्फत जानकारी गराएको हो ।
प्रदेश सरकारले प्रदेश सभामा पेस गरेको नीति तथा कार्यक्रम पारित नगर्न पार्टीले लगाएको ह्वीप उल्लंघन गरेपछि ती तीनैजना सांसदलाई पार्टीले गत जेठ ३० गते स्पष्टीकरण सोधेको थियो । स्पष्टीकरणको चित्तबुझ्दो जवाफ नदिएकाले राजनीतिक दलसम्बन्धी ऐन २०७३ अनुसार पार्टीले कारबाही गरेको जसपा संसदीय दलका नेता सहसराम यादवले बताए ।
यसअघि पार्टीको निर्णय विपरीत जसपाका चारजना प्रदेश सभा सदस्य प्रदेश सरकारमा सहभागी भएका थिए । तीमध्ये सुमन शर्मा रायमाझीले राज्यमन्त्रीबाट राजीनामा दिएपछि उनी कारवाहीबाट जोगिएकी छन् ।
