ऐतिहासिक मैदान लर्डसमा भएकाे दाेश्राे टेष्टमा भारतले इगंल्याण्डमाथी शानदार जित निकालेको छ। पाँचौ दिनमा बराबरीतर्फ अग्रसर खेलमा भारतिय बलरहरुले घातक प्रदर्शन गरेपछी भारतले इगंल्याण्डमाथी १ सय ५१ रनको शानदार जित निकालेको हो।
पहिलो पारीमा २७ रनको अग्रता लिएको ईग्लीस टोली भारतले दिएको २ सय ७२ रनको लक्ष्य पछ्याउन असफल भयो। दोश्रो पारीमा इगंल्याण्डका व्याटरहरु भारतीय बलरसामु निरिह देखिए। पहिलो ओभरदेखी नै दबाब बनाउन सफल भारतीय तिब्र गतीका बलरहरुले इगंल्याण्डलाई सम्हालिनै दिएनन्।
इगंल्याण्डले पहिलो ओभरमै विकेट गुमाएको थियो। भारतीय मुख्य बलर जसप्रित बुमराहले ओपर रोरी बर्नसलाई पहिलो ओभरको तेश्रो बलमै पभेलियनको बाटो देखाएका थिए। दोश्रो ओभर बलिङ गर्न आएका मोहमद शामीले चौथो बलमै अर्का ओपनर डोम सिम्बलेलाई क्रिज छाड्न बाध्य बनाए।
दुबै ओपनर खाता नखोली आउट भएको इगंल्याण्डको दोश्रो पारीमा ३ जना ब्याटरबाहेकले दोहोरो अंकमा समेत रन जोड्न सकेनन्। कप्तान जोए रुट (३३ रन), विकेटकिपर व्याटर जोस बटलर (२५) र अलराउण्डर मोइन अलि (१३) ले मात्र दोहोरो अंकमा रन बटुले। उसका कुन ५ व्याटर शुन्यमा आउट भए।
बलिङतर्फ भारतका मोहमद सिराजले ४ विकेट विकेट लिए। १० ओभर ५ बल फ्याकेक उनले ३२ रनमात्र खर्चिए। यस्तै जसप्रित बुमराहले १५ ओभरमा ३३ रन खर्चेर ३ विकेट हात पारे। इशान्त शर्माले १० ओभर बलिङ गर्दै १३ रन दिएर २ विकेट हात पारे भने मोहमद शामीले पनि १० ओभरमा १३ रन दिएर १ विकेट हात पारे। ६ ओभर बलिङ गरेर ५ रन दिएका स्पिनर रविन्द्र जडेजा भने विकेटविहिन रहे।
यसअघि पहिलो पारीमा २७ रनले पछि परेको भारतले दोश्रो पारीमा ८ विकेटको क्षतीमा २ सय ९८ रन बनाएर पारी घोषणा गरेको थियो। त्यसक्रममा भारतीय व्याटर अजनिक्य रहानेले सर्वाधिक ६१ रन बनाएका थिए भने बलर मोहमद शामीले शानदार ब्याटिङ गर्दै अविजित ५६ रन बनाएका थिए। यस्तै चेतेश्वर पुजाराले ४५, जसप्रित बुमराहले ३४, रिषभ पन्तले २२, रोहित शर्माले २१ र कप्तान विराट कोहलीले २० रन बनाएका थिए।
बलिङतर्फ इगंल्याण्डका मार्क वुडले ३, वली रोबिनसनले २, मोइन अलीले २ र साम कुर्रानले १ विकेट लिएका थिए।
यस्तै भारतले पहिलो पारीमा ३ सय ६४ रन बनाएको थियो। पहिलो पारीमा ओपनर केएल राहुले शतकिय पारी खेल्दै १ सय २९ रन बनाएका थिए भने रोहित शर्माले ८३, बिरान कोहलीले ४२, रविन्द्र जडेजाले ४० र रिषभ पन्तले ३७ रन बनाएका थिए। इगंल्याण्डका जेम्स एण्डरसनले ५, वली रोबिनसनले २, मार्क वुडले २ र मोइन अलीले १ विकेट लिएका थिए।
यसैगरी पहिलो पारीमा इगंल्याण्डले ३ सय ९१ रन बनाएको थियो। उसका लागि जोए रुटले शानदारी कप्तानी पारी खेल्दै १ सय ८० रन बनाएका थिए भने जोनी बेयरस्टोले ५७, रोरी बर्नसले ४९, मोइन अलीले २७ र जोस बटलरले २३ रन बनाएका थिए। बलिङतर्फ भारतका मोहमद सिराजले ४, इशान्त शर्माले ३ र मोहमद शामीले २ विकेट लिएका थिए।
केएल राहुल यो खेलको उत्कृष्ट खेलाडी घोषित भए।
