भ्वाइस अफ नेपाल सिजन—३ का विजेता किरण गजमेरले राष्ट्रपति विद्यादेवी भण्डारीसँग भेट गरेका छन् ।
मंगलबार राष्ट्रपति भण्डारीले शितल निवासमा बोलाएर भेट गरेको गजमेरले फेसबुकमार्फत जानकारी दिएका छन् । भेटमा राष्ट्रपति भण्डारीले आफूलाई बधाई र शुभकामना दिएको उनले बताएका छन् ।
उनले भनेका छन्, ‘उहाँसंग छोटो भलाकुसारी गर्न पाउँदा मैले आफूलाई संसारकै भाग्यमानी मानिसहरु मध्ये एउटा आफुलाई पनि ठानेको छु ।’
राष्ट्रपति भण्डारीले हौसल र शुभेच्छा आफूसँगै नेपाली भाषी भूटानीहरुलाई दिएको किरणले बताएका छन् ।
यसअघि गजमेरलाई प्रदेश १ का मुख्यमन्त्री शेरधन राईले भेटेर बधाई दिएका थिए ।
भ्वाइस अफ नेपाल सिजन–३ को विजेता गजमेर भुटानी शरणार्थीको रूपमा हुर्किएका हुन् ।
हाल अमेरिकामा अध्ययनरत २५ वर्षीय गजमेर झापाको खुदुनाबारी शिविरमा जन्मेका हुन् । उनी परिवारसँग सन् २०१० मा पुनर्वास प्रक्रियामा अमेरिका गएका थिए ।
