प्रदेश नम्बर २ का आन्तरिक मामिला तथा सञ्चार मन्त्री भरत प्रसाद साहले सञ्चार क्षेत्रमा देखिएका समस्यालाई व्यवस्थित रुपमा हल गर्दै पत्रकारको क्षमता अभिवृद्धिका लागि आगामी दिनमा मन्त्रालयले ठोस कार्यक्रम ल्याउने बताएका छन् ।
शुक्रबार वीरगंजमा आयोजित एक कार्यक्रमलाई सम्बोधन गर्दै मन्त्री साहले रौतहटको घटनाले पत्रकारको सुरक्षाप्रति पनि राज्यले विशेष ध्यान दिनु पर्ने आवश्यकता देखिएको बताए । उनले समानुपातिक रुपमा विज्ञापन वितरण नगरेर विगतमा आफ्ना आसेपासे, निकटका व्यक्ति तथा दलाली गर्नेलाई मात्र विज्ञापन दिने प्रथालाई आफूले तोडेर आवाज विहीन जनताको पक्षमा आवाज उठाउने मिडियालाई विज्ञापन दिने नीति अवलम्बन गरिने बताए ।
उनले प्रदेश २ मा धेरै सञ्चारमाध्यम सङ्कटमा परेको आफूले देखेको र अब प्रदेशमा आवश्यकताअनुसार चल्ने सक्ने पूर्वाधार भएका छापा तथा रेडियो, टिभीलाई मात्रै सञ्चालनको अनुमति दिने नीति ल्याइने जानकारी दिए ।
सञ्चारमन्त्री साहले च्याउ उम्रिएझैँ खुलेका मिडियाहरूलाई व्यवस्थित गर्न प्रदेश सरकारले मिडिया काउन्सिलमार्फत काम गर्ने जानकारी दिए । विगतमा के भयो, भन्नेतर्फ भन्दा अब के गर्नु पर्छ भन्नेतर्फ आफू लागेको उनले बताए ।
