अमेरिकी सहयोग नियोग मिलिनियम च्यालेन्ज कर्पोरेशन (एमसीसी) उपाध्यक्ष फतिमा सुमारसहितको टोलीको प्रमुख प्रतिपक्षी दल नेकपा (एमाले) का अध्यक्ष केपी शर्मा ओलीसहित नेताहरुसँग बालकोटमा भेटवार्ता भएको छ ।
चार दिनका लागि नेपाल भ्रमणमा आएकी पूर्वाधार परियोजना उपाध्यक्ष फतिमासहितको टोलीले प्रधानमन्त्री शेरबहादुर देउवासहित संसदमा सहभागी प्रमुख दलका नेताहरुसँग भेट्ने कार्यतालिका रहेको छ । नेपाल भ्रमणको पहिलो दिन एमसीसी प्रतिनिधिहरुले पहिलो भेट अध्यक्ष ओलीसँग गरेको हो ।
सो क्रममा ओलीले एमसीसीबारे सरकारको स्पष्ट धारणा आउनुपर्ने बताएका छन् । ओलीले वर्तमान सरकार बहुमतमै रहेकाले एमसीसी अनुमोदन गर्ने वा नगर्ने बारे सरकार पहिले स्पष्ट हुनुपर्ने बताए । उनले एमालेले अमेरिकी अनुदान सम्झौता एमसीसीबारे तत्काल धारणा नबनाउने स्पष्ट पारे ।
’विगतमा हामी सरकारमा छँदा एमसीसी अनुमोदन गर्न इमान्दार प्रयास गरेकै हौँ । तत्कालीन सभामुखले संसदमा पेस नगरिदिँदा अघि बढ्न सकेन । अहिले हामी प्रतिपक्षमा छौँ । यसमा प्रतिपक्षीको प्रत्यक्ष भूमिका हुँदैन । सरकारले के कसरी अगाडि बढाउँछ त्यसमा भर पर्छ । अहिलेसम्म हामीसँग सल्लाह समेत गरेको छैन,’ एमालेका विदेश विभाग प्रमुख राजन भट्टराईले ओलीको भनाइ उद्धृत गर्दै भने ।
एमसीसीकी उपाध्यक्ष सुमारले एमसीसी सम्झौता संसदबाट अनुमोदन गर्न सहयोग गर्न ओलीलाई आग्रह गरेकी थिइन् । उनले शिष्टाचार भेटका क्रममा एमसीसी सम्झौतामा आएका विवाद र अहिलेको अवस्थाबारे बुझ्न खोजेकी थिथइन् ।
भेटमा बैठकमा एमालेबाट ओलीसहित परराष्ट्र मामिला विज्ञ डा. राजन भट्टराई, स्थायी कमिटी सदस्य विष्णु रिमाल, केन्द्रीय सदस्य सूर्य थापालगायतका नेताहरुको सहभागिता रहेको थियो । तयस्तै, एमसीसी उपाध्यक्ष सुमारसँगै नायव उपाध्यक्ष जोनाथन ब्रुक्सलगायतको एमसीसी प्रतिनिधिमण्डल सहभागि थियो ।
प्रधानमन्त्री शेरबहादुर देउवासँग शुक्रबार साँझ बालुवाटारमा भेटघाट गर्ने तालिका रहेको बताइएको छ । त्यस्तै, एमसीसी प्रतिनिधिहरुले माओवादी केन्द्रका अध्यक्ष पुष्पकमल दाहाल, नेकपा एकीकृत समाजवादीका अध्यक्ष माधवकुमार नेपाल, जसपाका नेता डा. बाबुराम भट्टराई लगायतसँग भेटघाट गर्ने तयारी गरेका छन् ।
