झण्डै तिन महिनाको रस्साकस्सी पश्चात प्रधानमन्त्री शेरबहादुर देउवाले आज मन्त्रीपरिषद बिस्तार गर्दैछन् ।
मन्त्रीपरिषद बिस्तारपुर्व सत्ता गठबन्धनमा रहेका ४ वटै दलले मन्त्रीहरुको छनौट गरिसकेका छन् । छनौट भएका मन्त्रीहरुको आजै बेलुकी राष्ट्रपति भवन, सितल निवासमा सपथग्रहण हुने भएको छ ।
छनौट भएका मन्त्रीहरुमध्ये बारा जिल्लाबाट २ जना सांसदहरु मन्त्री बन्ने भएका छन् ।
बारा क्षेत्र नं.१ बाट निर्वाचित कांग्रेस नेता उमाकान्त चौधरीलाई नेपालि कांग्रेसले खानेपानि तथा सरसफाई मन्त्रालयमा सिफारीश गरेको छ ।
कांग्रेसको बिधार्थी राजनितिबाट उभ्रेका नेता चौधरी यसअघि स्वास्थ्य तथा जनसंख्या मन्त्री र कृषि तथा सहकारी सहायक मन्त्री भईसकेका छन् ।
कांग्रेस नेता कृष्णप्रसाद सिटौला समुहबाट मन्त्री बन्न लागेका चौधरी नेपाली कांग्रेसको १३ औ महाधिवेशनमा सिटौला समुहबाटै कोषाध्यक्षको उम्मेदवार भएका थिए । हाल उनि कांग्रेसको केन्द्रय सदस्य छन् ।
बाराको बारागढि गांपालिका बेल्वा निवासि चौधरी क्षेत्र नं.१ बाट प्रत्यक्ष निर्वाचित सांसद हुन् ।
त्यस्तै, बारा क्षेत्र नं. २ बाट निर्वाचित रामसहाय यादवलाई जनता समाजवादी पार्टि नेपालले वन तथा वातावरण मन्त्रीको रुपमा सिफारीश गरेको छ ।
शिक्षा पेशामा रहंदा रहंदै मधेशि जनअधिकार फोरमको स्थापनाकाल देखिनै मधेश आन्दोलनमा लागेका यादव २०६४ सालमा पार्टिको समानुपातिक तर्फबाट संबिधानसभा सदस्य चुनिएका थिए ।
जसपा अध्यक्ष उपेन्द्र यादवको ‘यस म्यान’ मानिने यादव हाल जसपा नेपालका महासचिव छन् ।
बाराको सिम्रौनगढ नगरपालिका कचोर्वा घर भएका यादव सालिन तथा बौद्धिक स्वभावका व्यक्ति मानिन्छन् ।
