पहाडको कुनाकन्दारबाट कलकल गर्दै बहेको छाङ्दी झरना देख्दै मनमोहक छ । मनै लोभ्याउने यस झरनाले पर्यटक तानिरहेको छ ।
विशेषगरी सामाजिक सञ्जाल फेसबुकमा तस्वीर राख्न थालेपछि झरनामा रमाउँन जाने ह्वात्तै बढेका छन् । फेसबुकमा झरनासँगै रमाउँदै खिचेका तस्वीर आउन थालेपछि झरना अवलोकनमा आउँदा अति सुन्दर र मनमोहक रहेको बताउनुहुन्छ, दिपेन्द्र भट्टराई । रामपुर नगरपालिका–१ स्थित चिन्ते सामुदायिक वन क्षेत्रमा रहेको छाङ्दी झरना अहिले पर्यटकको रोजाइमा परेको छ । हिजोआज यहाँ अवलोकन गर्न जानेको चहलपहल निकै छ । प्रचारप्रसारको अभाव र संरक्षणविहीन बनेको यस झरनाले सामाजिक सञ्जालमा तस्वीर छाएकै कारण पर्यटक तानिरहेको छ ।
कालीगण्डकी करिडोर सडकखण्डदेखि करिब ४०० मिटरमाथि रहेको यस झरनामा अहिले दैनिकजसो १५० देखि २०० को हाराहारीमा आन्तरिक पर्यटक आउने गरेको स्थानीयवासी नारायणप्रसाद सिग्देलले बताए । यहाँ रहेको गुफाभित्र २० देखि २५ जनासम्म मानिस अट्ने क्षमता रहेको अवलोकनकर्ता बताउँछन् । यहाँ रहेको गुफामा भने झाँक्रीले पहिले बासस्थान बनाएर बस्ने गरेको बुढापाका बताउँछन् ।वन समूहले कालीगण्डकी करिडोर सडकदेखि झरनासम्म पुग्न पर्यटकलाई सहज बनाउँदै बाटो निर्माण गरेपछि झरनाको चिसो पानीसँग रमाउने, गुफाभित्र अवलोकन गर्ने, तस्वीर, भिडियो खिचाउने र टिकटक बनाउनेको उत्साह छ ।
पर्यटकीयरुपमा सम्भावना बोकेको भए पनि समयमा नै प्राकृतिक सम्पदाको संरक्षण र स्तरोन्नति तथा प्रचारप्रसार नहुँदा पनि यो झरना ओझेलमा रह्यो । सामाजिक सञ्जाल (फेसबुक) मा धेरैले झरनासँगै रमाउँदै गरेको तस्वीर राख्न थालेपछि अहिले आन्तरिक पर्यटकको खचाखच छ ।
झरनाको माथिल्लो भागमा ढभाह खोला, छाङ्दी पधेँरा, छापको पधेँरा, ढभाह चिसोपानीको मूल र दुई वटा झरना, सनसरीमाइको पूजा गर्ने मन्दिर छ । करिब १५० मिटरको लम्बाइमा झरना आकारमा पानी बहेको छ ।
रामपुर नगरपालिकाले विनियोजन गरेको रु एक लाखबाट झरना परिसरमा पैदलमार्ग निर्माण गरिएको वडा नं १ का अध्यक्ष मित्रलाल कँडेलले बताए ।
झरना आसपासका क्षेत्रमा रहेका झाँडी सरसफाइ, पैदलमार्ग निर्माण कार्य गर्न सकेको खण्डमा रामपुर नगरले राम्रो आयस्रोत लिनसक्ने प्रशस्त सम्भावना छ । झरनाको पानीलाई सदुपयोग गर्दै रेन्बो ट्राउट माछापालन व्यवसाय गरी आर्थिकोपार्जन गर्न सकिन्छ ।
रामपुर नगरपालिकाले झरनालाई विशेष गुरुयोजना बनाएर पर्यटकीय क्षेत्रका रुपमा विकास गरेको खण्डमा यहाँ होमस्टे, रेष्टुरेन्ट सञ्चालन गरी स्थानीयले दरिलो आयआर्जनको स्रोत बढाउन सक्ने यहाँका व्यापारी कृतिनाथ श्रेष्ठको भनाइ छ ।
