चलचित्र ‘म यस्तो गीत गाउँछु–२’ माघ १९ गतेदेखि प्रदर्शन हुने भएको छ ।
उक्त चलचित्रका नायक पल शाहले ‘म यस्तो गीत गाउँछु–२’ माघ १९ गतेदेखि प्रदर्शन हुने सामाजिक सञ्जालमार्फत जानकारी दिएका छन् ।
उनले लेखेका छन्, ‘कुनै एक चलचित्र मात्र नभई पुरै नेपाली चलचित्र क्षेत्र नै चलायमान हुनु अहिलेको आवश्यकता हो । सोही उद्देश्यका साथ नेपाली चलचित्र ‘म यस्तो गीत गाउँछु–२’ यही वर्षको माघ १९ देखि प्रदर्शन गरिने निर्णय गरेको छौं ।’ उनले सम्पूर्ण चलचित्रकर्मी, पत्रकार र दर्शक महानुभावहरुबाट साथ र सहयोगको अपेक्षा गरेका छन् ।
चलचित्रको नयाँ पोष्टर सार्वजनिक गर्दै यसका निर्देशक तथा निर्माण सुदर्शन थापाले माघको १९ गतेबाट चलचित्र रिलिज हुने जानकारी दिए । उनले भने, ‘दर्शकले चलचित्रको प्रतीक्षा गरिरहनुभएको छ । यसैले यो प्रेमकथाको चलचित्रलाई हामीले प्रेम दिवसको छेको पारेर रिलिज गर्ने तयारी गरेका हौं ।’
‘म यस्तो गीत गाउँछु–२’ मा पल शाह, पूजा शर्मा, हरिहर शर्मा, दिनेश डिसी, राजा राजेन्द्र पोखरेल, सोनिका रोकायलगायतका कलाकारको अभिनय रहेको छ ।
सुदर्शन थापाको निर्देशन रहेको फिल्म अभिनेत्री पूजा र निर्देशक सुदर्शनले नै मिलेर बनाएका हुन् । फिल्ममा बनिष शाह र मिलन श्रेष्ठको सम्पादन, सौरभ लामाको छायाँकन छ ।
चलचित्रमा समावेश ‘तिम्रो घरको वरिपरि’ र ‘दुःखको काँडा’ बोलको गीत सुपरहिट भइसकेको छ । चलचित्रको ट्रेलरलाई पनि दर्शकले अत्याधिक मन पराएका छन् ।
यसअघि ‘म यस्तो गीत गाउँछु’लाई दर्शकले अत्याधिक मन पराएका थिए । ‘म यस्तो गीत गाउँछु–२’ पनि दर्शकले प्रतीक्षा गरेको चलचित्र हो । यो चलचित्रले उल्लेख्य दर्शक तान्ने अपेक्षा गरिएको छ ।
यसअघि उक्त चलचित्र २०७६ को फागुन ३० देखि प्रदर्शन हुने तय भएको थियो । तर, कोरोनाका कारण उक्त चलचित्रमो प्रदर्शन स्थगित गरिएको थियो ।
