बिहीबारदेखि राष्ट्रिय जनगणना २०७८ शुरु भए पनि लिपुलेक र लिम्पियाधुराको जनगणना अन्योलमै छ ।
देशभर कार्यक्रम शुरु भए पनि दार्चुलाको व्यास गाउँपालिका– १ बडाका गुन्जी, कुटी र नाभि गाउँका करिब ३२० परिवारका एक हजार जनाको गणना अन्योलमा परेको छ ।
सरकारले कात्तिक २५ गतेबाट शुरु गरेर १५ दिन पछि मङ्सिर ९ गते कार्यक्रम सम्पन्न गर्ने तालिका छ । मित्रराष्ट्र भारतसँग सीमा जोडिएको दार्चुलाको लिपुलेक र कालापानी क्षेत्रमा फिल्डमै पुगेर जनगणना गर्ने केन्द्रीय तथ्याङ्क विभागले तयारी गरे पनि भारत सरकारको असहमतिछि कार्यक्रम प्रभावित बनेको थियो ।
यता जनगणना गराउने विषयमा माथिल्लो निकायमा छलफल शुरु भएको र विभाग भूउपग्रहको सहयोगबाट पनि वैकल्पिक विधि अपनाउने सोच राखेको विभागका निर्देशक तथा तथ्याङक शाखा प्रमुख ढुण्डिराज लामिछानेले बताए । उनले भने, ‘हामी स्थानीय सरकार र स्थानीय प्रशासनसँग समन्व्य गरेका छौं । समयतालिका अनुसार गणना सम्पन्न गर्नेछौं ।’
यता जिल्ला प्रशासन कार्यालय दार्चुलालाई भने केन्द्रीय तथ्याङ्क विभागले कार्यालयमा कुनै पनि जानकारी र समन्वय नगरेको जिल्ला प्रशासन कार्यालय दार्चुलाका सहायक प्रमुख जिल्ला अधिकारी ज्योत्स्ना भटट् जोशीले जानकारी दिए ।
भारतको सिमाना जोडिएको नेपालको भूमि लिपुलेक र लिम्पियाधुरालाई विभागले कूूटनीतिक माध्यमबाट भारत सरकारसँग समन्वय गर्दै आएको जनाएको छ ।
जनगणना गर्नसकिने वातावरण बन्न नसके भूउपग्रहको माध्यमबाट सो क्षेत्रमा घरको गणना गर्ने र एउटा घरमा औसत रूपमा बसोबास गर्ने परिवारको सङ्ख्यालाई आधार मानेर तथ्याङ्क निकालिने तयारी विभागले गरेको छ ।
