आइतबार पनि वकिलहरूले मुल गेटमा धर्ना दिएर प्रधानन्यायाधीश चोलेन्द्रशम्शेर जबरालाई सर्वोच्च अदालत प्रवेशमा रोक लगाउने भएका छन् ।
उनीहरूले शुक्रबार मुल गेटमा धर्ना दिँदै प्रधानन्यायाधीश जबरालाई सर्वोच्च प्रवेशमा रोक लगाएका थिए । तर, आन्दोलनरत कानुन व्यवसायीको धर्ना छल्दै जबरा महान्यायाधिवक्ताको कार्यालयसँगै रहेको सर्वोच्चको अर्को गेटबाट भित्र छिरेका थिए ।
नेपाल बार एसोसिएसनका अध्यक्ष चण्डेश्वर श्रेष्ठले शुक्रबारको विरोध कार्यक्रमलाई आइतबार पनि जारी राख्ने जानकारी दिए ।
भएन बहस
बिहीबार नेपाल बार एशोसिएसनले गरेको धर्नामा प्रहरीले धरपकड गरेको थियो । सोको विरोधमा आज कानुन व्यवसायीहरुले कुनै पनि मुद्दामाथि बहस गरेनन् ।
प्रधानन्यायाधीश जबराले शुक्रबारका लागि आठ वटा इजलास तोकेका थिए ।
हिजोको धर्नामा प्रहरीले बल प्रयोग गर्दा केही कानुन व्यवसायी घाइते भएको भन्दै नेपाल बारले हिजै विज्ञप्ति जारी गर्दै शुक्रबार बन्दी प्रत्यक्षीकरणका रिटमा समेत बहस नगर्ने निर्णय गरेको थियो । आज इजलास तोकिएको मुद्दाको ‘बेन्च नबसेको’ सर्वोच्चले जनाएको छ ।
