सर्वोच्च अदालतका प्रधानन्यायाधीश चोलेन्द्रशम्शेर जबराले नेपाल बारका पदाधिकारीलाई वार्ताका लागि आह्वान गरेका छन् ।
सोमबार एक विज्ञप्ति जारी गर्दै वार्ताका लागि आह्वान गरेका हुन् । विज्ञप्तिमा न्यायापालिकाले जहिले पनि विधिको शासनको पालना गर्ने भएकोले विधिको शासनप्रति दृढतापूर्वक उभिने बताएका छन् ।
‘न्यायपालिकाले सधैँभरी विधिको बाटो मात्रै हिँड्नुपर्दछ भन्ने मान्यतालाई आत्मसात गरेको हुन्छ’, उनले विज्ञप्तिमा भनेका छन्, ‘पारस्परिक हार्दिकताको त्यो क्रम जहाँबाट टुटेको छ, त्यहीँबाट समाधानको सम्भावना खोज्न सकिन्छ । विधिको पक्षमा दृढतापूर्वक उभिँदै न्यायपालिकाको एकै परिवारभित्र देखिएका समस्याको हल गर्न विग्रहको बाटो छोडी संवादको मार्ग रोजौँ भनी पुनः सबैमा हार्दिक आह्वान गर्दछु ।’
‘वर्तमान परिस्थितिमा देखिएका गतिरोधहरूको सम्बोधनको उपयुक्त विकल्प संवाद नै रहेको हुँदा नेपाल बार एसोसिएसन र सर्वोच्च अदालत बार एसोसिएसनलाई सवादका लागि आव्हानसमेत गर्दछु,’ राणाको विज्ञप्तिमा भनिएको छ ।
कानून व्यवसायीहरूको प्रदर्शनको बाबजुद सोमबार पनि प्रधानन्यायाधीश जबरा सर्वोच्च अदालतभित्र प्रवेश गरेका थिए । उनी एक नम्बर गेट प्रयोग गरेर सर्वोच्च अदालतभित्र प्रवेश गरेका हुन् । एक नम्बर गेटमा प्रहरीले कानून व्यवसायीहरूलाई धर्ना दिन रोक लगाएको छ ।
कानून व्यवसायीहरू अर्को मुख्य गेटमा धर्नामा बसेका छन् ।
कानून व्यवसायीहरूले मूल गेटमा धर्ना दिएपछि गत शुक्रबार आइतबार पनि प्रधानन्यायाधीश जबरा वैकल्पिक गेटबाटै सर्वोच्चभित्र प्रवेश गरेका थिए ।
