बरहथवा नगरपालिका–१ मा आमासहित दुई छोराछोरी आइतबार बिहान घरमै मृत फेला परेका छन् ।
मृत फेला पर्नेमा शिरे हजराकी २६ वर्षीया श्रीमती कविता हजरा, ६ वर्षीया छोरी सलोनी र ४ वर्षीय छोरा स्वागत रहेको प्रहरीले जनाएको छ ।
आमा कविता पासो लागेको अवस्थामा र छोराछोरी ओछ्यानमै मृत फेला परेको इलाका प्रहरी कार्यालय बरहथवाका डिएसपी उमाशंकर यादवले जानकारी दिए ।
तीनैजनाको शव पोस्टमार्टमका लागि अस्पताल लगिएको छ । आमाले छोराछोरीलाई विष खुवाएर आफूले आत्महत्या गरेको हुन सक्ने प्रहरीले आशंका गरेको छ । घटनाबारे थप अनुसन्धान भइरहेको प्रहरीले जनाएको छ ।
कविताका श्रीमान् शिरे वैदेशिक रोजगारमा छन् ।
