राप्रपाको अध्यक्षमा कमल थापालाई हराउँदै युवा नेता राजेन्द्र लिङ्देन विजयी भए ।
आइतबार बिहान सम्पन्न मतपरिणामबाट थापालाई १०० बढी मतले हराउँदै लिङ्देन विजयी भए । लिङ्देनले एक हजार ८४४ मत ल्याए भने थापाले एक हजार ६१७ मत प्राप्त गरे ।
अध्यक्षमा पराजित भएलगत्तै थापा सामाजिक सञ्जालमा बर्बराउन थालेका छन् । उनले आफू अध्यक्षमा हार्ने निश्चित भएपछि परिणाम सार्वजनिक नहुँदै पूर्व राजा ज्ञानेन्द्र शाहलाई आरोप लगाउँदै ट्वीट गरेका थिए ।
पहिलो ट्वीटमा उनले पराजय सहर्ष स्विकार्दै पार्टीको आन्तरिक प्रतिस्पर्धामा निर्मल निवासको नाङ्गो हस्तक्षेपको भत्सर्ना गरे साथै, उनले पूर्व राजालाई बधाई दिन पनि भ्याए ।
उनले भनेका छन्, ‘मैले राहत र उन्मुक्ति पाएको छु । सिङ्गो मुलुक गणतन्त्रमय भएको बेला शिरमा कफन बाँधेर २०६३ साल देखि राजसंस्था बोकेर हिँडेको पुरस्कार आज पाईयो।सो एजेण्डाको मुल संवाहकलाई राजनीतिकरुपमा समाप्त पार्न गरिएको चेष्टाले राजाको भलो होस् । हार्दिक शुभ–कामना ।’
उक्त ट्वीटमा थापाले पूर्व राजालाई मेन्सन गरेका छन् । तर, उक्त मेन्सन गरिएको ट्वीटर अकाउन्ट पूर्व राजाले चलाएको भन्ने हालसम्म पुष्टि भएको छैन ।
हारपछि आक्रोश र उत्तेजनामा देखिएका थापाले एउटा फेक आइडीबाट गरिएको ट्विट सेयर गरेका छन् र त्यसमा पूर्वयुवराज्ञी हिमानी शाहलाई पनि बधाई दिएका छन् ।
पूर्वयुवराज्ञी हिमानी शाहको नाममा खुलेको फेक आइडीबाट ‘अवसरबाद, नाताबाद, कृपाबादको अन्त्य गर्न सफल हुनुभएकोमा राष्ट्रबादी नेता राजेन्द्र लिङ्देनलाई हार्दिक बधाई तथा सफल कार्यकाल को सुभकामना !!! राजेन्द्र लिङ्देनको जित सङ्गै मुलुकले मुलुकले आज सच्चा राष्ट्रबादी नेता पाउन सफल भएको छ !!!’ भन्ने ट्वीट भएको थियो ।
उक्त ट्वीटलाई रि–ट्वीट गर्दैै थापाले लेखेका छन्, ‘अब चाँडै राजसंस्था पुनःस्थापना हुने भएको हुँदा पूर्वयुवराज्ञी हिमानी शाहलाई पनि हार्दिक बधाई तथा शुभकामना ।’
राप्रपाको एकता महाधिवेशनबाट अध्यक्षमा निर्वाचित राजेन्द्र लिङ्देनसहितको नवनिर्वाचित पदाधिकारी र केन्द्रीय सदस्यको शपथग्रहण कार्यक्रमलाई बहिस्कार गरेर सामाजिक सञ्जालमा सक्रिय थापाले अहिले एउटा कविता सम्झेका छन् ।
उनले भनेका छन्, ‘मेरो अन्तर्मन भित्र मेरो मान्यता माथि गम्भीर प्रश्न चिन्ह खडा भएको अहिलेको अवस्थामा कवि राजेन्द्र थापाको यो कविता सम्झन मन लाग्यो’
‘पोहोर साल खुशी फाट्दा
जतन गरि मनले टाले
त्यहि साल माया फाट्यो
त्यसलाई पनि मनले टाले
यसपाली त मनै फाट्यो
केले सिउने केले टाल्ने हो?’
राप्रपाको एकता महाधिवेशनबाट अध्यक्षमा निर्वाचित अध्यक्ष लिङ्देनसहितको नवनिर्वाचित पदाधिकारी र केन्द्रीय सदस्यको शपथग्रहण कार्यक्रमलाई निवर्तमान अध्यक्ष कमल थापाले बहिस्कार गरेका छन् ।
कमलादीस्थित प्रज्ञा प्रतिष्ठानमा आयोजित नवनिर्वाचित पदाधिकारी तथा केन्द्रीय सदस्यको प्रमाणपत्र वितरण तथा शपथग्रहण कार्यक्रममा थापा अनुपस्थित भए ।
अध्यक्षमा पराजित भएदेखि थापा पूरै सामाजिक सञ्जालमा सक्रिय भएका छन् । फेसबुक र ट्विटरमा उनका आधिकारिक पेजहरुबाट एकपछि अर्को उत्तेजक र भावुक पोष्टहरु भइरहेको छ । थापाका धाराप्रवाह स्टाटसहरुले उनलाई पराजयको चोट सहन गाह्रो परिरहेको झल्किन्छ ।
