नेपालमा पनि कोरोनाको ओमिक्रोन भेरियन्ट फेला परेको छ ।
स्वास्थ्य मन्त्रालयका ६६ वर्षीय विदेशी नागरिक र उनको सम्पर्कमा आएका ७१ वर्षीय व्यक्तिमा ओमिक्रोन भेरियन्ट पुष्टि भएको छ ।
मन्त्रालयका सह–प्रवक्ता समिर अधिकारीका अनुसार मंसिर ३ गते ओमिक्रोन भेटिएको देशबाट नेपाल प्रवेश उनीहरूको मंसिर ७ गते परीक्षण गरिएको थियो ।
उनीहरूसँग सम्पर्कमा आएका ६६ जनाको कन्ट्याक्ट ट्रेसिंग गरिएको र पीसीआर गर्दा सबैको नतिजा नेगेटिभ आएको मन्त्रालयले जनाएको छ ।
रोकथाम प्रयास
ओमिक्रोनको भेरिएन्ट रोक्न नेपालले अन्तरराष्ट्रिय हवाई तथा स्थल नाकाहरूमा यात्रुहरूको आवतजावतलाई व्यवस्थित गर्न सबै यात्रुको नेगटिभ पीसीआर रिपोर्ट अनिवार्य गरेको गरेको छ ।
खोपको विवरण लिने गरेको, लक्षण तथा चिन्हहरूको जाँच गर्ने व्यवस्था गरेको तथा हवाई र स्थल नाकाहरू भई प्रवेश गर्ने पूर्ण मात्रा खोप नलगाएका र शंकास्पद सबै यात्रुहरुको एन्टिजेन परीक्षण गर्ने गरिएको छ ।
एन्टिजेन परीक्षणमा पोजिटिभ फेला परेकाहरुको नमुना संकलन गरी पीसीआर गर्ने गरिएको छ । यसका साथै विगत एक महिना अगाडिदेखि पोजिटिभ भएका नमुनाहरुको थप परिक्षण गर्ने गरिएको मन्त्रालयले जनाएको छ ।
यससंगै नेपालमा ओमिक्रोनको निगरानीका लागि सर्भिलेन्स तथा कन्ट्याक्ट ट्रेसिंगको कार्यलाई थप प्रभावकारी बनाइएको मन्त्रालयले जानकारी दिएको छ ।
नेपालले पनि दक्षिण अफ्रिकाबाट नेपाल आउन रोक लगाएको छ ।
आग्रह
संक्रमणबाट बच्न पनि जनस्वास्थ्यका सबै मापदण्डहरुको पालना गर्न मन्त्रालयका सह–प्रवक्ता अधिकारीले आग्रह गरे ।
मास्कको सही प्रयोग, भौतिक दुरी कायम गर्ने, भिडभाड नगर्ने तथा हात धुने कार्य, हावा आवतजावत राम्रो हुने स्थानमा बस्न उनको आग्रह छ ।
साथै, खोपको प्रयोग महत्वपूर्ण हुने भएकोले सबैमा मापदण्डको पालना गर्न र खोप अभियानमा सहभागिता हुनु मन्त्रालयले अनुरोध गरेको छ ।
लकडाउनको चिन्ता तथा चासो !
नेपालमा पनि कोरोनाको ओमिक्रोन भेरियन्ट फेला परेसँगै फेरि लकडाउन हुने हो कि भन्ने चिन्ता तथा चासो आम मानिसमा पाइन्छ ।
ओमिक्रोन संक्रमण पुष्टि भए पनि सरकार भने तत्काल लकडाउन गर्ने पक्षमा छैन ।
मन्त्रालयले जोखिमलाई दृष्टिगत गरी सावधानी अपनाउन आग्रह गरिरहेको छ । साथै, खोपको अभियानलाई बढाउँदै लाने र खोप नलगाएकालाई कडाई गर्नेतर्फ सरकारले तयारी गरिरहेको छ ।
मन्त्रालयका एक अधिकारी भन्छन्, ‘लकडाउन भन्दा हिजोआज ओमिक्रोन कसरी रोक्नेतर्फ योजना बनाइरहेको छौं । अब कुन गतिमा फैलिन्छ, त्यसमा लकडाउन गर्ने नगर्ने कुरा निर्भर हुन्छ । तीव्र गतिमा फैलियो भने त लकडाउनको विकल्प हुँदैन ।’
नेपालमा उक्त भेरियन्ट फेलिने–नफैलिने र लकडाउ गर्ने–नगर्ने भन्ने कुरा भारतमा पनि निर्भर पर्ने बताउँछन् ।
भारतसँग नेपालको खुला सिमाना छ । त्यसकारण भारतमा उक्त भेरियन्ट देखिएमा नेपालमा पनि फैलने उच्च जोखिम हुन्छ ।
यसअघि भारतमा कोरोना संक्रमण फैलिएलगत्तै नेपालमा पनि कोरोनाले भयावह रुप लिएको थियो ।
फेरि लकडाउन हुन्छ कि हुँदैन भन्ने प्रश्नमा मन्त्रालयका ती अधिकारीले भने, ‘त्यसका लागि कम्तीमा दुई हप्ता कुनुपर्छ । कुन गतिमा ओमिक्रोन भेरियन्ट फैलिन्छ, त्यसअनुसार हामी अगाडि बढ्छौं ।’
ओमिक्रोन
दक्षिण अफ्रिकामा पहिलोपटक पहिचान भएको ओमिक्रोन भेरिअन्ट अहिलेसम्म छिमेकी भारत सहित ४० भन्दा बढी देशहरूमा फैलिइसकेको छ ।
यो भरिअन्ट अत्यधिक उत्परिवर्तित भएको भनिएपनि खोपको प्रभावकारिता हुने वा नहुनेबारे बैज्ञानिकहरू अझैसम्म स्पष्ट भइसकेका छैनन् । विश्व स्वास्थ्य सङ्गठनका वैज्ञानिकहरूले यसबाट नआत्तिन तर सचेत रहन आग्रह गरेका छन् ।
विश्वका धेरै देशहरूले दक्षिण अफ्रिकासहित ओमिक्रोन भेटिएका देशहरूमा यात्रा प्रतिबन्ध लगाएका छन् ।
