म्याग्दीको विकट धौलागिरि गाउँपालिका १ गुर्जामा हिउँमा पुरिएर बिहीवार एकजना बेपत्ता भएका छन् ।
गुर्जाको सुकेलट्टेमा हिमपातका कारण गोठ भत्किँदा ५० वर्षीय रामबहादुर छन्त्याल बेपत्ता भएको वडा अध्यक्ष झकबहादुर छन्त्यालले जानकारी दिए ।
उनका अनुसार अन्य तीनजना हिउँमा फसेर अलपत्र परेका छन् ।बस्तीदेखि टाढाको गोठमा बस्दैआएका जगदेवी छन्त्याल, बुद्धि छन्त्याल र लालबहादुर विक हिउँमा फसेर अलपत्र परेको उनले बताए ।
बेपत्ताको खोजी र अलपत्रको उद्धारका लागि हेलिकोप्टर ल्याउने तयारी भएको उनले जानकारी दिए ।भारी मात्रामा भएको हिमपातका कारण गुर्जा जाने पदमार्ग, विद्युत र मोवाइल तथा इन्टरनेट सेवा बन्द भएको छ ।
गुर्जा पुग्न गाउँपालिका केन्द्र मुनादेखि एकदिन समय लाग्छ । बाक्लो मात्रामा हिमपात भएकाले टेलिफोन र इन्टरनेटका सेवा प्रवाहका लागि स्थापना गरिएको टावरमा क्षति पुगेको छ ।
