विभिन्न १२ सुत्रिय माग राखी तराई–मधेशमा किसान आन्दोलन शुरु गरेको जनमत पार्टीले आज देशको राजधानी काठमाडौंमा समेत प्रदर्शन गरेको छ ।
जनमत पार्टीको उपत्यका समन्वय समितिले माईतिघर मण्डलामा किसानहरूको माग पुरा गर्न माग गर्दै विरोध प्रदर्शन गरेको हो ।
दर्जनौंको संख्यामा रहेका प्रदर्शनकारीहरुले मण्डला क्षेत्रमा प्रदर्शन गर्दै अन्नदाता किसानहरुको समस्या समाधान गर्न सरकारलाई दवाव दिएका थिए ।
प्रदर्शनमा सहभागीहरूले ‘किसानको माग पूरा गर, समयमा मल सिँचाइको व्यवस्था गर’ किसान उपर दमन बन्द गर’ लगायतका नाराहरु लगाएका थिए ।
तराई–मधेशमा हरेक वर्ष किसानी गर्ने समयमा मल अभाव झेल्दै आएका किसानहरुले सहज ढंगले मल, खाद्द तथा बिउबिजन र सिचाईको माग गरेका हुन् ।
