पछिल्लो २४ घण्टामा ४३५ जना कोरोना भाइरसका सङ्क्रमित थपिएका छन् ।
छ हजार ७१५ जनामा आरटीपीसीआर परीक्षण गरिएकोमा ३७० जना र तीन हजार ५५२ जनामा एन्टीजेन परीक्षण गरिएकोमा ६५ जनामा कोरोना सङ्क्रमण पुष्टि भएको स्वास्थ्य तथा जनसङ्ख्या मन्त्रालयले जनाएको छ ।
पछिल्लो २४ घण्टामा २३९ जना कोरोनामुक्त भएको स्वास्थ्य मन्त्रालयले जनाएको छ । स्वास्थ्य मन्त्रालयले नेपालमा कोरोना सङ्क्रमणमुक्त हुने दर ९८ प्रतिशत रहेको जनाएको छ ।
सोही अवधिमा कोही पनि सङ्क्रमितको मृत्यु नभएको स्वास्थ्य मन्त्रालयले जनाएको छ । नेपालमा हालसम्म कोरोनाबाट ११ हजार ६०१ जनाको मृत्यु भएको मन्त्रालयले जनाएको छ ।
यसैगरी, देशभर हालसम्म पाँच हजार २२५ जना सक्रिय सङ्क्रमित रहेको स्वास्थ्य मन्त्रालयले जनाएको छ ।
त्यस्तै पछिल्लो २४ घण्टामा दुई लाख ४० हजार ३३८ जनाले कोरोनाविरुद्धको खोप लगाएका छन् ।
पछिल्लो समय कोरोना संक्रमण बढ्दै गएको छ । यसअघि दैनिक सय ढेड सयमा संक्रमण पुष्टि हुने गरेको थियो । तर, पछिल्लो हप्ता संक्रमण बढ्दै गएको मन्त्रालयको तथ्याङ्कले देखाएको छ । मंगलबार ३९३ जनामा संक्रमण देखिएको थियो ।
