महोत्तरीको गौशालाबाट ८ किलो लागुऔषध गाँजासहित एकै परिवारका चारजना पक्राउ परेका छन् ।
पक्राउ पर्नेमा गौशाला नगरपालिका–४ रजखोर बस्ने करिव ७० वर्षिय रामचन्द्र साह, उनको करिव ५० वर्षिय छोरा उपेन्द्र साह, करिव २१ वर्षिय नाती रोहित साह र १९ वर्षिय नाती विवेक साह रहेको जिल्ला प्रहरी कार्यालय महोत्तरीका प्रहरी नायव उपरीक्षक प्रकाश विष्टले बताए ।
लागुऔषध गाँजाको कारोबार गरिरहेको भन्ने विशेष सूचनाको आधारमा मंगलवार साँझ इलाका प्रहरी कार्यालय गौशालाका प्रहरी निरीक्षक विष्णु प्रदिप वस्यालको टोलीले उनीहरुको घर खानतलासी गर्दा ८ केजी गाँजा बरामद भएको प्रहरी नायव उपरीक्षक विष्टले बताए ।
उनका अनुसार प्रहरीले खानतलासी गर्दा रामचन्द्रको घरबाट बिक्रीको लागी पुरिया बनाई राखेको तयारी गाँजा ३ केजी, डिजिटल तराजु एक थान र गाँजा बिक्री गरेकोे जम्मा नगद १ हजार १ सय रुपैया बरामद गरी रामचन्द्र र उनका २१ बर्षिय नाती रोहितलाई पक्राउ गरिएको हो ।
यस्तै रामचन्द्रको छोरा उपेन्द्र साहको घरबाट बिक्रीको लागी पुरिया बनाई राखेको तयारी गाँजा ५ केजी, डिजिटल तराजु एक थान र गाजा बिक्री गरेको नगद ६ हजार ५सय रुपैया बरामद गरी उपेन्द्र र उनका १९ वर्षिय छोरा विवेक साहलाई पक्राउ गरिएको प्रहरी नायव उपरीक्षक विष्टले बताए ।
पक्राउ परेकाहरुलाई लागुऔषध मुद्दामा कारबाही प्रक्रिया अघि बढाइएको छ ।
