भारतमा कोरोना संक्रमितको आँकडा दिनहुँ उकालो लाग्दै छ। भारतमा ८१ दिनपछि पुनः सक्रिय संक्रमित संख्या २ लाख १४ हजार ४ जना पुगेको छ।
भारतीय स्वास्थ्य मन्त्रालयका अनुसार पछिल्लो २४ घण्टामा भारतमा ४२ हजार १ सय ७४ नयाँ संक्रमित थपिएका छन्। महाराष्ट्र र नयाँ दिल्लीमा कोरोना संक्रमितको संख्या तीव्र गतिमा फैलिरहेको छ।
महाराष्ट्र एसोसिएसन अफ रेजिडेन्ट डाक्टर्सका अध्यक्ष तथा जेजे अस्पतालका डा. गणेश सोलन्केले मुम्बईका विभिन्न अस्पतालमा २ सय ३० जना डाक्टरमा कोरोना संक्रमण पुष्टि भएको बताएका छन्।
कर्नाटकको बल्लारीस्थित विजयनगर मेडिकल कलेजमा एमबीबीएस अध्ययनरत २१ जनामा कोरोना पुष्टि भएको छ। २ सय ५० जनाको कोरोना परीक्षण गर्दा २१ जनामा संक्रमण पुष्टि भएको कलेज प्रशासनले जनाएको छ।
महाराष्ट्रमा मात्रै पछिल्लो २४ घण्टामा २६ हजार ५ सय ३८ संक्रमित थपिएका छन्। मुम्बईमा १५ हजार १ सय ६६ संक्रमित थपिएका छन्। मुम्बईमा मात्र २ सय १८ डाक्टरमा संक्रमण पुष्टि भएको छ।
