माओवादी केन्द्रका अध्यक्ष प्रचण्डले भौतिक रूपमा भेटेरै बधाई एवं शुभकामना आदानप्रदान गर्न रोकेका छन् ।
प्रचण्डको सचिवालय बिहीबार एक सूचना जारी गर्दै उक्त जानकारी दिएको हो ।
सूचनामा भनिएको छ, ‘राजनीतिक कामको व्यस्तता, भीडभाड र स्वास्थ्य सतर्कताको कमिका कारण काठमाडौंलगायतका विभिन्न स्थानमा बढेको कोभिड संक्रमण तथा स्वास्थ्यकर्मीहरुको समेत सुझावलाई मध्यनजर गर्दै विगत तीन दिन यतादेखि भौतिक रूपमा भेटेरै भैरहेको बधाई एवं शुभकामना आदानप्रदानलाई आजैका दिनदेखि रोकेको कुरा जानकारी गराउदछौं । यसकारण पर्न गएको अफ्ठ्यारोका लागि सचिवालय क्षमा चाहन्छ ।’
पार्टीको नियमित प्रक्रियामार्फत हुने संस्थागत भेटघाटलाई पार्टी केन्द्रीय कार्यालय पेरिसडाँडामार्फत व्यवस्थित गर्न कोसिस गरिने र कतिपय सम्वाद, भेटघाट, बैठक र छलफललाई प्रविधिको प्रयोगमार्फत सहजीकरण गरिने सचिवालयले जनाएको छ ।
केन्द्रीय कार्यालयका केहीलाई कोभिड संक्रमण पुष्टि भएकोले कार्यालयमा हुने भीडभाडमा पनि उच्च स्वास्थ्य सतर्कता अपनाउन सबैमा अनुरोध गरिएको छ ।
प्रचण्ड माओवादीको आठौं राष्ट्रिय महाधिवेशनबाट पुनः अध्यक्ष भयन भएपछि खुमलटारमा उनलाई बधाई दिनेकोभीड लागेको थियो ।
उनले बधाई तथा शुभकामनाका लागि सम्पुर्ण राजनैतिक शक्ति, स्वदेश तथा विदेशमा रहेका नेपाली दिदीबहिनी तथा दाजुभाइहरु, सम्पुर्ण पार्टीपंक्ति तथा शुभेच्छुकहरुलाई हार्दिक आभार तथा धन्यवाद व्यक्त गरेका छन् ।
