प्रधानमन्त्री शेरबहादुर देउवा र नेकपा (एमाले)का अध्यक्ष केपी शर्मा ओलीबीच बालकोटमा भेटवार्ता भएको छ ।
नेकपा (एमाले)ले प्रतिनिधिसभा बैठकमा निरन्तर अवरोध गरेपछि अवरोध हटाउने विषयमा सर्वदलीय बैठकमा समेत एमाले उपस्थित नभएपछि प्रधानमन्त्री देउवा छलफलका लागि ओली निवास बालकोट पुगेका थिए ।
प्रधानमन्त्रीका प्रेस संयोजक गोविन्द परियारले प्रधानमन्त्री शेरबहादुर देउवा नेकपा (एमाले)का अध्यक्ष केपी शर्मा ओलीलाई संसदमा गरेको अवरोध अन्त्य गर्ने विषयमा छलफल भएको जानकारी दिए ।
प्रधानमन्त्री देउवा र ओलीबीच भएको भेटमा अमेरिकी सहायता परियोजना एमसीसी अगाडि बढाउने विषयमा पनि छलफल भएको बुझिएको छ।
यसैगरी, दुईबीच समसामयिक विषयमा पनि छलफल भएको प्रधानमन्त्रीको सचिवालयले जनाएको छ ।
एमालेले माधवकुमार नेपाल नेतृत्वको नेकपा (एकीकृत समाजवादी) पार्टीका सांसद उपस्थित भएको संसद र बैठकहरूमा उपस्थित नहुने अडान राख्दै आएपछि केही दिनदेखि प्रतिनिधिसभा बैठक सुचारू रूपले सञ्चालित हुन समस्या परेको छ ।
हिजो सत्तापक्षीय गठबन्धनका नेताहरूको बैठकले प्रतिनिधिसभा अवरोध हटाउनको लागि एमाले पार्टीसँग अपिल गर्ने निर्णय गरेको थियो ।
यसअघि सरकार सञ्चालनमा सहयोग गर्न गठित उच्चस्तरीय संयन्त्रका संयोजक रामचन्द्र पौडेल बालकोट पुगेर एमाले अध्यक्ष ओलीसँग छलफल गरेका थिए ।
