नेकपा एमालेको जिल्ला अधिवेशनअन्तर्गत कैलालीमा नेतृत्वका आकाङ्क्षीबिच सहमति नजुटेपछि आइतबार चुनाव हुने भएको छ।
सहमतिमै जिल्ला नेतृत्व छान्ने प्रयास भए पनि सहमति नजुटेपछि अन्ततः निर्वाचन हुने भएको हो । वर्तमान अध्यक्ष रतन थापा र उपाध्यक्ष रणबहादुर चन्द चुनावी मैदानमा उत्रिएका छन्।
उनीहरूले आ-आफ्नो प्यानल सहित चुनावी मैदानमा उत्रिएका हुन् । थापा प्यानलबाट उपाध्यक्षमा दुर्गा जोशी, सचिवमा दानबहादुर बिक र उपसचिवमा प्रेम चौधरी र मदन ओझा उम्मेदवार रहेका छन्।
त्यस्तै, वर्तमान उपाध्यक्ष चन्द प्यानलबाट उपाध्यक्षमा सिताराम बुढाथोकी, सचिवमा डेजी पाण्डे र उपसचिवमा ममताप्रसाद चौधरी र लोकेन्द्र शाही उम्मेदवार रहेका छन्। यसअघि थापा, चन्द र जिल्ला कमिटी सचिवालय सदस्य डेजी पाण्डेले पनि अध्यक्षमा दाबी गरिरहेका थिए ।
प्यानलसहित चुनावमा जाने तयारी भएपछि पाण्डेले उपाध्यक्ष चन्दलाई अध्यक्षमा समर्थन गर्ने घोषणा गरेका छन्। कैलालीमा २२ हजार बढी संगठित सदस्य छन्।
आयोजक कमिटी र प्रतिनिधि गरी करिब ५६६ जनाले मतदान गर्नेछन्। आज नै निर्वाचन कमिटीले निर्वाचन तालिका समेत सार्वजनिक गरिसकेको छ । मतदान भोलि आइतबार बिहान ८:३० बजेदेखि १ :३० बजेसम्म मतदान हुने प्रमुख निर्वाचन अधिकृत चक्रराज तिमिल्सेनाले बताए।
