जनता समाजवादी पार्टीका नेता तथा विरगञ्जका सांसद प्रदिप यादवले ८ जिल्लाको मधेश प्रदेशलाई २२ जिल्लामा विस्तार गर्ने अभियान शुरु भएको बताएका छन् ।
मधेशको पहिचानको लागी प्रदेश २ को नाम मधेश प्रदेश कायम गरिनु आंशिक उपलब्धी भएको भन्दै सांसद यादवले अबको लडाई प्रदेशलाई २२ जिल्लामा विस्तार गरिनु भएको बताए ।
काँग्रेस–कम्युनिष्टहरुले मधेशको पहिचानलाई स्विकार नै नगर्ने अवस्थामा मधेश प्रदेश कायम गरिनु आफैमा उपलब्धिमुलक भएको यादवले बताए ।
‘मधेशी समुदायको पहिचानको लडाई जारी छ, आंशिक उपलब्धी प्राप्त भएको छ, सांसद यादवले भने– ‘शहिदहरुको सपना पुरा हुने बाटोमा हामी लागेका छौं, अब २२ जिल्लाको सिंगो मधेशको लडाई शुरु हुनेछ ।’
बलिदानी दिवसको अवसरमा जसपा पर्साले आज विरगञ्जमा आयोजना गरेको श्रद्धाञ्जली कार्यक्रममा घण्टाघर चौकमा निर्मित मधेसी शहिद स्मारकमा आन्दोलनका शहिदहरुको प्रतिमामा माल्यार्पण गर्दै सांसद यादवले अधिकारको लडाई लामो समयसम्म लडनुपर्ने भएको हुनाले आगामी लडाईकालागी तयार रहन आग्रह गरेका थिए ।
विरगञ्जलाई मधेश प्रदेशको राजधानी नबनाउन काँग्रेस, एमाले, नेकपा(एस) र माओवादीले ठुलो भुमिका खेलेको कुरा जगजाहेर भएको समेत यादवले बताए ।
उनले प्रदेशसभामा सहभागी सबै दलका राष्ट्रिय अध्यक्षहरुको आदेशमा वीरगञ्जसँग बेइमानी गरिएको आरोप लगाउंदै, वीरगञ्जसँग गद्दारी भएको बताए ।
मधेश आन्दोलनमा हरेक बलिदानी विरगञ्जले दिएको, नेताहरुले विरगञ्ज आएर मधेश प्रदेशको राजधानी बनाउने उदघोष गरेको तर अन्तिममा धोखा दिएको उनले लगाए ।
काँग्रेसका युवाहरुले मुख्यमन्त्री लालबाबु राउत गद्दीको द्दरमा ढुंगामुडा गरेको बिषयमा बोल्दै सौसद यादवले मुख्यमन्त्री मात्रैले राजधानी तोक्न नसक्ने भन्दै बचाउ गरेका छन् ।
‘नाम र राजधानी तोक्ने अधिकार प्रदेशसभाको हो’ सांसद यादवले भने– ‘ढुंगामुडा गर्ने नै हो भने काँग्रेस–कम्युनिष्टका सांसदको घरमा गर, उनिहरुलेनै विरगञ्जसंग गद्दारी गरेका हुन् ।’
सांसद यादवले काँग्रेस–कम्युनिष्टले कहिल्यैपनी विरगञ्जलाई राजधानी बनाउन नचाहेको र अहिले आएर आन्दोलनको नाममा नाटक गरेको भन्दै बिरगञ्जका काँग्रेसीहरुलाई आफ्ना केन्दिीय नेताहरुसंग यसबारे जवाफ माग्न आग्रह समेत गरे ।
